തിരുവനന്തപുരം:ജില്ല സ്കൂൾ കായികമേളക്ക് ഞായറാഴ്ച കാര്യവട്ടത്ത് തുടക്കം. കാര്യവട്ടം എൽ.എൻ.സി.പി.ഇയിൽ തിരിതെളിയുന്ന റവന്യൂ ജില്ല സ്കൂൾ കായികമേള ജില്ല പഞ്ചായത്ത് പ്രസിഡന്റ് ഡി.സുരേഷ്കുമാർ ഉദ്ഘാടനം ചെയ്യും. ജില്ലയിലെ 12 ഉപജില്ലകളിലും സ്പോർട്സ് സ്കൂളുകളിലും നിന്നായി സബ് ജൂനിയർ, ജൂനിയർ, സീനിയർ വിഭാഗങ്ങളിൽ നിന്നായി 5000 പരം കായികതാരങ്ങളാണ് മത്സരത്തിൽ പങ്കെടുക്കുന്നത്. അതേസമയം രണ്ടാംവർഷ ഹയർ സെക്കൻഡറി/ വി.എച്ച്.എസ്.ഇ വിദ്യാർഥികൾക്ക് തിങ്കളാഴ്ച മുതൽ ഇംപ്രൂവ്മെന്റ് പരീക്ഷ ആരംഭിക്കുന്ന സാഹചര്യത്തിൽ കായികമേളയുടെ തീയതിയും മത്സരക്രമങ്ങളും സംഘാടകസമിതി പുനഃക്രമീകരിച്ചു.
ഇതുപ്രകാരം 10ന് നടത്താൻ നിശ്ചയിച്ചിരുന്ന കായികമത്സരങ്ങൾ 14 ലേക്ക് മാറ്റി. സീനിയർ വിഭാഗം ആൺ, പെൺകുട്ടികളുടെ 3000 മീറ്റർ, 800 മീറ്റർ, 100 മീറ്റർ ഓട്ടം മത്സരങ്ങൾ, ജാവലിൻ ത്രോ, ഹൈജംപ്, ലോങ് ജംപ്, ഷോട്ട് പുട്ട്, 4×100 മീറ്റർ റിലേ മത്സരങ്ങൾ ഞായറാഴ്ച നടക്കും. തിങ്കളാഴ്ച സബ് ജൂനിയർ, ജൂനിയർ വിഭാഗങ്ങളുടെ മത്സരങ്ങൾ മാത്രമാകും നടക്കുക. സമാപന ദിനമായ 14ന് സീനിയർ വിഭാഗത്തിന്റെ ക്രോസ് കൺട്രി, പോൾവാൾട്ട്, ട്രിപ്പിൾജംപ്, 200 മീറ്റർ ഓട്ടം, 400 മീറ്റർ ഓട്ടം, 400 മീറ്റർ ഹർഡ്ൽസ്, നടത്ത മത്സരങ്ങളും അവശേഷിക്കുന്ന സബ്ജൂനിയർ, ജൂനിയർ മത്സരങ്ങളും നടക്കുമെന്നും സംഘാടകസമിതി അറിയിച്ചു. 16 മുതൽ 20 വരെ തൃശൂർ കുന്നംകുളം സീനിയർ മൈതാനിയിലെ സിന്തറ്റിക് ട്രാക്കിലാണ് സംസ്ഥാന കായികോത്സവം അരങ്ങേറുക.
