കൊല്ക്കത്ത: ചികിത്സാ പിഴവിനെ തുടര്ന്ന് 37 വയസുള്ള എന്ജിനിയര് മരിച്ച സംഭവത്തില് ഡോക്ടര്മാര്ക്ക് 60ലക്ഷം രൂപ പിഴ. കൊല്ക്കത്തയിലെ സ്വകാര്യ ആശുപത്രിയിലെ രണ്ട് ഡോക്ടര്മാര്ക്കാണ് 60 ലക്ഷം രൂപ പിഴ ചുമത്തിയിരിക്കുന്നത്. ആറ് ആഴ്ചയ്ക്കുള്ളില് പരിഹരാത്തുക നല്കാനാണ് നിര്ദ്ദേശിച്ചിരിക്കുന്നത്. ഇന്ഷുറന്സ് കമ്പനി 30 ലക്ഷം രൂപയും ബാക്കി പണം കാന്സര് വിദഗ്ധരായ ഡോ രാജേഷ് ജിന്ഡലും ഡോ സഞ്ജയ് പട്വാരിയുമാണ് നല്കേണ്ടത്. രണ്ട് ലക്ഷം രൂപ ആശുപത്രിയും നല്കണം. ദേശീയ ഉപഭോക്തൃ തര്ക്കപരിഹാര കമ്മീഷന്റേതാണ് തീരുമാനം.
കൃത്യമായ ചികിത്സ ലഭിക്കാത്തതായിരുന്നു 37കാരന്റെ മരണത്തിന് കാരണമായത്. സുഷുമ്നാ നാഡിയിലൂടെ നല്കേണ്ടിയിരുന്ന മരുന്ന് ഞരമ്പിലൂടെ നല്കിയതിന് പിന്നാലെ ഇയാളുടെ ആരോഗ്യ സ്ഥിതി വഷളാവുകയായിരുന്നു. ഈ വര്ഷം ജൂലൈ 9നാണ് യുവാവ് മരിച്ചത്. യുവാവിന്റെ ഭാര്യയും പ്രായപൂര്ത്തിയാവാത്ത മകനുമാണ് ചികിത്സാ പിഴവിന് 3.1 കോടി രൂപ നഷ്ടപരിഹാരം ആവശ്യപ്പെട്ട് കോടതിയിലെത്തിയത്.
