കൊച്ചി : ഡോളർ കടത്തുകേസിൽ സ്പീക്കർ പി.ശ്രീരാമകൃഷ്ണനെ ചോദ്യം ചെയ്യുന്നതിന് കസ്റ്റംസ് നിയമോപദേശം തേടി. കൊച്ചിയിലെ അസിസ്റ്റന്റ് സോളിസിറ്റർ ജനറൽ (എസിജി) ഓഫിസിനോടാണു നിയമോപദേശം തേടിയത്. സ്പീക്കറെ ചോദ്യം ചെയ്യുന്നതിനു മുമ്പായി പൂർത്തിയാക്കേണ്ട നിയമപരമായ നടപടി ക്രമങ്ങൾ എന്തെല്ലാമാണ്, ഈ വിഷയത്തില്‍ ഏതെങ്കിലും തടസ്സങ്ങൾ ഉണ്ടോ തുടങ്ങിയ കാര്യങ്ങളാണ് ആരാഞ്ഞിരിക്കുന്നത്.
കസ്റ്റംസ് കമ്മിഷണർ സുമിത് കുമാർ, അസിസ്റ്റന്റ് സോളിസിറ്റർ ജനറൽ പി.വിജയകുമാറിനോടാണ് നിയമോപദേശം തേടിയതെന്നാണു വിവരം. സമാന വിഷയത്തിൽ സുപ്രീം കോടതിയിൽനിന്നു നേരത്തെ ഉണ്ടായിട്ടുള്ള ഉത്തരവുണ്ടെന്നും ഇതു പരിശോധിച്ചശേഷം മറുപടി നൽകാമെന്നുമാണ് എസിജി ഓഫിസ് കസ്റ്റംസിനെ അറിയിച്ചിരിക്കുന്നത്. ഇക്കാര്യത്തിൽ കസ്റ്റംസ് കമ്മിഷണർ പ്രതികരിച്ചിട്ടില്ല.
ഡോളർ കടത്തു കേസിൽ തന്നെ ചോദ്യം ചെയ്യില്ലെന്നും കുറ്റം ചെയ്തിട്ടില്ലെന്നുമാണ് കഴിഞ്ഞ ദിവസവും സ്പീക്കർ വാർത്താ സമ്മേളനത്തിൽ ആവർത്തിച്ചത്. അതേസമയം സ്പീക്കറുടെ അസിസ്റ്റന്റ് പ്രൈവറ്റ് സെക്രട്ടറി കെ.അയ്യപ്പനെ കസ്റ്റംസ് കൊച്ചിയിൽ ചോദ്യം ചെയ്യുന്നത് തുടരുകയാണ്. രണ്ടിലേറെ തവണ നോട്ടിസ് അയച്ച ശേഷമാണ് അദ്ദേഹം ചോദ്യം ചെയ്യലിന് ഹാജരായത്.
