കുളത്തൂപ്പുഴ: കുടുംബ വഴക്കിനെ തുടര്‍ന്ന് മകളുടെ ഭര്‍ത്താവ് തലയിലൂടെ ആസിഡൊഴിച്ച്‌ പരിക്കേല്‍പ്പിച്ച വൃദ്ധനെ ആശുപത്രിയില്‍ പ്രവേശിപ്പിച്ചു.
സാംനഗര്‍ കാഞ്ഞിരോട്ട് കുന്ന് സജിനി വിലാസം വീട്ടില്‍ മനോഹര(70)നെയാണ് കഴിഞ്ഞ ദിവസം രാത്രി എട്ടോടെ സ്വകാര്യ ആശുപത്രിയില്‍ പ്രവേശിപ്പിച്ചത്. തുടര്‍ന്ന് തിരുവനന്തപുരം മെഡിക്കല്‍ കോളജിലേക്ക് മാറ്റി. സംഭവത്തില്‍ മകളുടെ ഭര്‍ത്താവും കുളത്തൂപ്പുഴയിലെ ഓട്ടോ ഡ്രൈവറുമായ ബാബുക്കുട്ടനുവേണ്ടി കുളത്തൂപ്പുഴ പോലീസ് അന്വേഷണം ആരംഭിച്ചു.
കുടുംബപ്രശ്നത്തെ തുടര്‍ന്ന് ഇരുവരും തമ്മില്‍ നിരന്തരം വഴക്കുണ്ടാവാറുണ്ടായിരുന്നു. കഴിഞ്ഞദിവസം വഴക്കിനിടെ വീട്ടില്‍ റബര്‍ പാലിലൊഴിക്കാനായി തയാറാക്കി വെച്ചിരുന്ന ആസിഡ് ബാബുക്കുട്ടന്‍ മനോഹരന്റെ തലയിലൂടെ ഒഴിക്കുകയായിരുന്നു.
