നിരണം : നോമ്പു കാലയളവിൽ ഭക്ഷണം ഉപേക്ഷിച്ച് ഇടവകയിലെത്തിച്ച നേർച്ച പണം കൊണ്ട് നിർധന വിദ്യാർത്ഥിക്ക് സൈക്കിൾ സമ്മാനിച്ചു. സെൻ്റ് തോമസ് ബിലീവേഴ്സ് ഈസ്റ്റേൺ ചർച്ച് നിരണം ഇടവകയാണ് മാതൃകപരമായ സേവന പ്രവർത്തനം നടത്തിയത്. നോമ്പു കാലയളവിൽ വെള്ളിയാഴ്ച ദിവസങ്ങളിൽ ഒരു നേരമെങ്കിലും ഉപവസിച്ച് പ്രാർത്ഥനയിൽ പങ്കാളികളാകണമെന്ന് ഇടവക വികാരി റവ.ഫാദർ.ജോസ് കരിക്കം ഇടവകയിലെ വിശ്വാസികളോട് ആഹ്വാനം ചെയ്തിരുന്നു. അങ്ങനെ ശേഖരിച്ച തുകയാണ് ജീവകാരുണ്യ പ്രവർത്തനങ്ങൾക്കായി മാറ്റി വെച്ചത്.
വിശുദ്ധ കുർബാനയ്ക്കു ശേഷം നടന്ന ചടങ്ങിൽ ഡോ.ജോൺസൺ വി. ഇടിക്കുള അധ്യക്ഷത വഹിച്ചു. റവ.ഫാദർ.ജോസ് കരിക്കം സൈക്കിളും ഭക്ഷ്യധാന്യ കിറ്റും വിതരണം ചെയ്തു. പോൾ സി. വർഗ്ഗീസ് ആശംസ അറിയിച്ചു.
