ചെന്നൈ : നഗരത്തെ നടുക്കിയ ഇരട്ടകൊലപാതക- കൊള്ള കേസില് പ്രതികള് പിടിയില്. വ്യവസായിയും ബിസിനസുകാരനുമായ ചെന്നൈ മൈലാപ്പൂര് വൃന്ദാവന് നഗര് ദ്വാരക കോളനി ശ്രീകാന്ത് (60), ഭാര്യ അനുരാധ (55) എന്നിവരാണ് കൊലപ്പെട്ടത്. ഇവരുടെ കുടുംബ ഡ്രൈവര് കൃഷ്ണ (45), സുഹൃത്ത് രവി (50) എന്നിവരാണ് പ്രതികള്.മകള് സുനന്ദയുടെ പ്രസവത്തോടുബന്ധിച്ച് മാര്ച്ചിലാണ് ദമ്ബതികള് അമേരിക്കയിലേക്ക് പോയത്.
ശനിയാഴ്ച പുലര്ച്ചെ മൂന്നരയോടെ ചെന്നൈയില് തിരിച്ചെത്തി. കൃഷ്ണയാണ് ഇവരെ വിമാനത്താവളത്തില്നിന്ന് കാറില് മൈലാപ്പൂരിലെ വീട്ടിലേക്ക് വിളിച്ചുകൊണ്ടുവന്നത്. പിന്നീട് സുഹൃത്ത് രവിയുമായി ചേര്ന്ന് ഇരുവരെയും അടിച്ചു കൊലപ്പെടുത്തുകയുമായിരുന്നു. മൃതദേഹങ്ങള് ചാക്കിലാക്കി കാറില് കയറ്റി ശ്രീകാന്തിന്റെ നെമിലിച്ചേരിയിലെ ഫാം ഹൗസില് കൊണ്ടുപോയി കുഴിച്ചുമൂടി. തുടര്ന്ന് കൊള്ളയടിക്കപ്പെട്ട ഒന്പത് കിലോ സ്വര്ണവും 70 കിലോ വെള്ളിയുമായി പ്രതികള് കാറില് രക്ഷപ്പെടുകയായിരുന്നു.
ശനിയാഴ്ച ഉച്ചയോടെയാണ് കൊലപാതക വിവരം പുറത്തായത്. തുടര്ന്ന് നടത്തിയ അന്വേഷണത്തില് ശനിയാഴ്ച വൈകീട്ട് ആറരയോടെ ആന്ധ്രയില്വെച്ചാണ് പ്രതികള് പിടിയിലായത്. മൊബൈല്ഫോണ് സിഗ്നലുകളുടെ അടിസ്ഥാനത്തില് ആന്ധ്ര പൊലീസിന്റെ സഹായത്തോടെയാണ് പ്രതികളെ പിടികൂടിയതെന്ന് സൗത്ത് ചെന്നൈ സിറ്റി അഡിഷനല് പോലീസ് കമ്മീഷണര് കണ്ണന് അറിയിച്ചു.
തൊണ്ടിസാധനങ്ങളും കണ്ടെടുത്തു. ഞായറാഴ്ച ഫാംഹൗസില് കുഴിച്ചിട്ട മൃതദേഹങ്ങള് പോലീസ് പുറത്തെടുത്ത് ഇന്ക്വസ്റ്റ് നടത്തി പോസ്റ്റുമോര്ട്ടം നടത്തി. പ്രതികള് നേപ്പാളിലേക്ക് കടക്കാനായിരുന്നു പരിപാടിയെന്ന് ചോദ്യംചെയ്യലില് അറിവായി. കൃഷ്ണയുടെ പിതാവ് ശ്രീകാന്തിന്റെ ഫാംഹൗസിലെ കാവല്ക്കാരനായി ജോലി ചെയ്തിരുന്നു. ഇൗ നിലയിലാണ് വിശ്വസ്തനെന്ന നിലയില് മകന് കൃഷ്ണയെ കുടുംബ ഡ്രൈവറായി നിയോഗിച്ചത്.