സുല്‍ത്താന്‍ ബത്തേരി : ബന്ധുവീട്ടില്‍ വിരുന്നിനെത്തിയ രണ്ടര വയസ്സുകാരി പുഴയില്‍ വീണതായി സംശയം. മീനങ്ങാടിക്കടുത്ത് പുഴങ്കുനി മലക്കാട് പുഴയിലാണ് കല്‍പറ്റ മാനിവയല്‍ തട്ടാരത്തൊടി ഷിജു-ധന്യ ദമ്പതികളുടെ മകള്‍ ശിവ പാര്‍വണയെയാണ് കാണാതായത്. ശനിയാഴ്ച രാവിലെ പത്തോടെയാണ് കുട്ടിയെ കാണാതാകുന്നത്. പുഴങ്കുനി ചെവായില്‍ രഞ്ജിത്തിെന്‍റ വീട്ടില്‍ വിരുന്നിനെത്തിയതായിരുന്നു കുട്ടിയുടെ കുടുംബം.
അല്‍പനേരം വീട്ടുകാരുടെ ശ്രദ്ധ തെറ്റിയപ്പോള്‍ കുട്ടിയെ കാണാതാവുകയായിരുന്നു. വീടിനടുത്താണ് പുഴ. പുഴയോരത്തെ ചെളിയില്‍ കുട്ടിയുടെ കാല്‍പ്പാടുകള്‍ കണ്ടെത്തി. കുട്ടിയുടെ ദേഹത്ത് ആഭരണങ്ങള്‍ ഉണ്ടായിരുന്നതായി മേപ്പാടിയിലെ ബന്ധുക്കള്‍ പറഞ്ഞു. സ്ഥലത്ത് അപരിചിതരുടെ സാന്നിധ്യമുണ്ടായിരുന്നതായും ചിലര്‍ സംശയം പ്രകടിപ്പിക്കുന്നുണ്ട്. കല്‍പറ്റ, സുല്‍ത്താന്‍ ബത്തേരി ഫയര്‍ഫോഴ്സും കല്‍പറ്റ തുര്‍ക്കി ജീവന്‍ രക്ഷാസമിതി പ്രവര്‍ത്തകരുമാണ് തിരച്ചിലിനായി എത്തിയത്. തിരച്ചില്‍ ഞായറാഴ്ചയും തുടരും.
