ഒറ്റപ്പാലം : ആഭരണം വാങ്ങാനായി ജൂവലറിയിലെത്തിയ ആള് രണ്ടരപ്പവൻ സ്വർണവുമായി ഇറങ്ങിയോടി. ഒറ്റപ്പാലം നഗരത്തിലെ ജൂവലറിയിൽ ബുധനാഴ്ച ഉച്ചയ്ക്ക് ഒന്നരയോടെയാണ് സംഭവം. ഒന്നേകാൽ പവൻവീതം തൂക്കം വരുന്ന രണ്ടുമാലകളാണ് നഷ്ടമായത്. ആഭരണങ്ങൾ വാങ്ങാനെന്ന വ്യാജേന ജൂവലറിയിലെത്തിയ ഇയാൾ മാലകൾ കാണിക്കാനാവശ്യപ്പെട്ടു. മേശയുടെ മുകളിൽവെച്ച് സ്വർണമാലകൾ നോക്കുന്നതിനിടെ ഉടമ മറ്റൊരു മാല ഷെൽഫിലേക്ക് വെക്കാൻ തിരിഞ്ഞ സമയത്ത് മാലകളുമായി യുവാവ് കടന്നുകളയുകയായിരുന്നു.
നഗരത്തിൽ ഇയാളെ അന്വേഷിച്ചെങ്കിലും കണ്ടെത്താനായില്ല. പോലീസ് അന്വേഷണം തുടങ്ങി. ജൂവലറിയുടെ സി.സി.ടി.വി. ക്യാമറയിൽ ഇയാളുടെ ദൃശ്യങ്ങൾ പതിഞ്ഞിട്ടുണ്ട്. ചുവപ്പുബനിയൻ ധരിച്ച മലയാളം സംസാരിക്കുന്ന ആളാണ് കവർച്ച നടത്തിയതെന്ന് പോലീസ് പറയുന്നു. എന്നാൽ മുഖാവരണം ധരിച്ചിരുന്നതിനാൽ ആളെ തിരിച്ചറിയാനാകാത്ത സ്ഥിതിയിലാണ് പോലീസ്.
