തിരുവനന്തപുരം : മലങ്കര സഭയുടെ ആത്മീയാചാര്യന് ഡോ ഫിലിപ്പോസ് മാര് ക്രിസോസ്റ്റോം വലിയ മെത്രോപൊലീത്തയുടെ വിയോഗത്തില് അനുശോചിച്ച് പ്രതിപക്ഷ നേതാവ് രമേശ് ചെന്നിത്തല. ദൈവത്തെ പോലും ചിരിപ്പിക്കുന്ന വലിയ ഇടയന് മലയാളിയുടെ വരദാനമായിരുന്നുവെന്ന് അദ്ദേഹം ഫേസ്ബുക്കില് കുറിച്ചു. ജാതി മത വേലിക്കെട്ടുകള്ക്ക് അപ്പുറത്ത് മനുഷ്യരുടെ ദുഃഖത്തില് ഇടപെടുകയും അവ പരിഹരിക്കാന് തന്നാലാവുന്നത് എല്ലാം പ്രവര്ത്തിക്കുകയും ചെയ്ത മഹാവ്യക്തിത്വമാണ് വിടപറഞ്ഞതെന്നും കുറിപ്പില് പറയുന്നു.
ചെന്നിത്തലയുടെ വാക്കുകള് ഇങ്ങനെ
നര്മ്മത്തില് പൊതിഞ്ഞ ചിന്ത മലയാളിക്ക് സമ്മാനിച്ച ക്രിസോസ്റ്റം തിരുമേനിക്ക് വിട. കാലംചെയ്ത വലിയ തിരുമേനി ഡോ. ഫിലിപ്പോസ് മാര് ക്രിസോസ്റ്റം വലിയ മെത്രാപ്പൊലീത്തയ്ക്ക് കണ്ണീരില് കുതിര്ന്ന ആദരാഞ്ജലികള്.
വലിയ ജീവിത പ്രശ്നങ്ങള് പോലും നര്മത്തില് ചാലിച്ച ചിന്തയിലൂടെ അലിയിച്ചു കളഞ്ഞ വലിയ ഇടയന്, സന്തോഷത്തിന്റേയും ആഹ്ലാദത്തിന്റെയും ഒരുപാട് ഓര്മകള് ലോകത്തിനു സമ്മാനിച്ചാണ് മടങ്ങുന്നത്. ജാതി മത വേലിക്കെട്ടുകള്ക്ക് അപ്പുറത്ത് മനുഷ്യരുടെ ദുഃഖത്തില് ഇടപെടുകയും അവ പരിഹരിക്കാന് തന്നാലാവുന്നത് എല്ലാം പ്രവര്ത്തിക്കുകയും ചെയ്ത മഹാവ്യക്തിത്വമാണ് വിടപറഞ്ഞത്. വ്യക്തിപരമായി ഏറെ അടുപ്പം പുലര്ത്തിയിരുന്ന വലിയ തിരുമേനിയുടെ വേര്പാട് അങ്ങേയറ്റം സങ്കടമുണ്ടാക്കുന്നു.
എന്നെ എന്നും സ്നേഹത്തോടെ ചേര്ത്തുപിടിച്ചു ആവോളം വാത്സല്യം നല്കിയിരുന്നു. ആത്മീയ അനുഭൂതിയും പോസിറ്റീവ് ചിന്തകളും അദ്ദേഹവുമായുള്ള കൂടിക്കാഴ്ചകളുടെ സമ്മാനമാണ്. ദൈവത്തെ പോലും ചിരിപ്പിക്കുന്ന വലിയ ഇടയന് മലയാളിയുടെ വരദാനമായിരുന്നു. നര്മത്തിന്റെ മേലാട ചാര്ത്തിയ നുറുങ്ങുകളും കഥകളും വിഷമങ്ങളെ മറികടക്കാന് വരും തലമുറകളെയും സഹായിക്കും.
