ന്യൂഡല്ഹി: എട്ട് ഇന്ത്യന് ഇന്സ്റ്റിറ്റ്യൂട്ട് ഓഫ് ടെക്നോളജികളി (ഐ.ഐ.ടി)കളില് ഡയറക്ടര്മാരെ നിയമിക്കുന്നതിന് രാഷ്ട്രപതി ദ്രൗപതി മുര്മു അനുമതി നല്കിയതായി വിദ്യാഭ്യാസ മന്ത്രാലയം അറിയിച്ചു.പാലക്കാട്, തിരുപ്പതി, ധാര്വാഡ്, ഭിലായ്, ഗാന്ധിനഗര്, ഭുവനേശ്വര്, ഗോവ, ജമ്മു തുടങ്ങി എട്ട് ഐ.ഐ.ടികളിലേക്കുള്ള ഡയറക്ടര്മാരുടെ നിയമനത്തിനാണ് രാഷ്ട്രപതി മുര്മു അംഗീകാരം നല്കിയത്.
ഐ.ഐ.ടി മദ്രാസിലെ മെക്കാനിക്കല് എഞ്ചിനീയറിങ് വിഭാഗം പ്രഫസര് എ. ശേഷാദ്രി ശേഖറിനെ പാലക്കാട് ഐ.ഐ.ടി ഡയറക്ടറായും ഐ.ഐ.ടി മദ്രാസിലെ പ്രഫസര് കെ. എന് സത്യനാരായണനെ ഐ.ഐ.ടി തിരുപ്പതിയിലുമാണ് നിയമിച്ചത്. ഐ.ഐ.ടി (ബി.എച്ച്.യു) പ്രഫസര് രാജീവ് പ്രകാശിനെ ഐ.ഐ.ടി ഭില്ലായിയിലെ ഡയറക്ടറായും പ്രഫസര് രജത് മൂനയെ ഐ.ഐ.ടി ഗാന്ധിനഗറിലും നിയമിച്ചു.
പ്രഫസര് പശുമര്ത്തി ശേഷു (ഐ.ഐ.ടി ഗോവ), പ്രഫസര് വെങ്കപ്പയ്യ ആര് ദേശായി (ഐ.ഐ.ടി ധാര്വാഡ്), പ്രഫസര് ശ്രീപദ് കര്മാല്ക്കര് (ഐ.ഐ.ടി ഭുവനേശ്വര്), പ്രഫസര് മനോജ് സിങ് ഗൗര് (ഐ.ഐ.ടി ജമ്മു) എന്നിവിടങ്ങളിലും നിയമിതരായി. ഐ.ഐ.ടി മദ്രാസിന്റെ സ്ട്രാറ്റജിക് പ്ലാന് (2021-27) കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന് തിങ്കളാഴ്ച രാവിലെ പുറത്തിറക്കി. ഐ.ഐ.ടികള് കേവലം വിദ്യാഭ്യാസ സ്ഥാപനങ്ങള് മാത്രമല്ലെന്നും ശാസ്ത്രീയ മനോഭാവം സൃഷ്ടിക്കാനും മനുഷ്യരാശിയുടെ ഭാവി രൂപപ്പെടുത്താനുമുള്ള കേന്ദ്രങ്ങളാണെന്നും ചടങ്ങില് അദ്ദേഹം പറഞ്ഞു.
