റാന്നി : വനാന്തർഭാഗങ്ങളിൽ ജീവിക്കുന്ന ആദിവാസി കുടുംബങ്ങൾക്ക് വീടെന്ന സ്വപ്നം യാഥാർത്ഥ്യമാകുന്നു. ളാഹ മഞ്ഞ തോട്ടിൽ താമസിക്കുന്ന മലമ്പണ്ടാരം വിഭാഗത്തിൽപ്പെട്ട 20 കുടുംബങ്ങൾക്കാണ് ഒന്നാം ഘട്ടമായി ഒരേക്കർ സ്ഥലം വീതം നൽകും. ഇതിന്റെ ഉദ്ഘാടനം 3 ന് രാവില 10 ന് രാജാം പാറ ഫോറസ്റ്റ് സ്റ്റേഷന് സമീപം വനം മന്ത്രി എ കെ ശശീന്ദ്രൻ നിർവഹിക്കുമെന്നും പട്ടികജാതി പട്ടികവർഗ്ഗ വകുപ്പ് മന്ത്രി കെ രാധാകൃഷ്ണൻ ആദിവാസികൾക്ക് ഭൂമി വിതരണം നിർവഹിക്കുമെന്നും അഡ്വ. പ്രമോദ് നാരായൺ എംഎൽഎ.
മണ്ണാറക്കുളഞ്ഞി – ചാലക്കയം ശബരിമല പാതയോട് ചേർന്ന് ശബരിമല പൂങ്കാവനത്തിൽ താമസിക്കുന്ന 43 മലമ്പണ്ടാരം വിഭാഗത്തിലെ ആദിവാസി കുടുംബങ്ങൾക്കാണ് വനാവകാശനിയമപ്രകാരം ഒരേക്കര് ഭൂമി വീതം നൽകുക. ഇതിന്റെ ഒന്നാം ഘട്ടമായി നടപടികൾ പൂർത്തിയായ 20 കുടുംബങ്ങൾക്ക് ഭൂമി നൽകും. അവശേഷിക്കുന്ന 23 പേർക്ക് സർവ്വേ നടപടികൾ പൂർത്തിയായി ഒക്ടോബർ ആദ്യവാരം ഭൂമി നൽകും. നൽകുന്ന ഭൂമിയിൽ ഇവർക്ക് ഏതെങ്കിലും സർക്കാർ ഏജൻസിയെ നിയോഗിച്ച് വീടുകൾ വെച്ച് നൽകാനാണ് തീരുമാനം. വീടുകൾക്ക് സൗജന്യമായി വൈദ്യുത കണക്ഷനും നൽകും. വനാവകാശ നിയമപ്രകാരം നൽകുന്ന ഭൂമിയുടെ അടിക്കാട് തെളിയിച്ച് കൃഷികൾ ചെയ്യാനുള്ള അവകാശവും ഇവർക്ക് ഉണ്ടാകുമെന്നും എംഎല്എ വ്യക്തമാക്കി.
