മല്ലപ്പള്ളി : കോട്ടാങ്ങൽ പഞ്ചായത്ത് 10-ാം വാർഡിലെ വട്ടക്കാവിൽ15 ഓളം കുടുംബങ്ങൾക്ക് കുടിവെള്ളം കിട്ടാക്കനിയാകുന്നു. കാടിക്കാവ്, വട്ടക്കാവ് റോഡിൽ കൊറ്റനാട് പഞ്ചായത്തിനോട് ചേർന്നു കിടക്കുന്ന പ്രദേശവാസികൾക്കാണ് ഈ ദുർഗതി. ഇവിടെ വാട്ടർ അതോറിറ്റിയുടെ പൈപ്പുലൈൻ സ്ഥാപിച്ച് വെള്ളവും എത്തിയിരുന്നതാണ്. എന്നാൽ ആറു മാസത്തിലേറെയായി ഇവിടെ വെള്ളമെത്തിയിട്ട്. 200 മീറ്റർ അടുത്തു വരെ പൈപ്പുലൈനിലൂടെ വെള്ളമെത്തുനുണ്ട്.
സാധാരണക്കാരായ കുടുംബങ്ങൾ മുഴുവൻ ആവശ്യങ്ങൾക്കും വെള്ളം വില കൊടുത്ത് വാങ്ങേണ്ട ഗതികേടിലാണിപ്പോൾ. റോഡിന്റെ ശോച്യാവസ്ഥ കാരണം ദേശത്ത് വാഹനങ്ങളിൽ വെള്ളമെത്തിക്കണമെങ്കിൽ അമിത വിലയും നൽകേണ്ടി വരുന്നു. പ്രദേശത്തെ കുടിവെള്ളക്ഷാമം പരിഹരിക്കാൻ ജനപ്രതിനിധികളുടെ ഭാഗത്തുനിന്നും നടപടിയുണ്ടാകുന്നില്ല. വേനൽ ചൂട് കടുത്തതോടെ കുടിവെള്ളത്തിനായി അധികൃതരുടെ കനിവും കാത്തു കഴിയുകയാണ് ഈ കുടുംബങ്ങൾ.
