റാന്നി : വടശ്ശേരിക്കര പഞ്ചായത്തിലെ സമ്പൂർണ്ണ കുടിവെള്ള വിതരണത്തിന് 53.02 കോടി രൂപ അനുവദിച്ചു. മൈലപ്ര, മലയാലപ്പുഴ, വടശ്ശേരിക്കര പഞ്ചായത്തുകളെ ബന്ധപ്പെടുത്തിയുള്ള ബൃഹത്തായ പുതിയ കുടിവെള്ള പദ്ധതിയാണ് അനുവദിച്ചിരിക്കുന്നത്. ജല ലഭ്യത ഉറപ്പാക്കാൻ മണിയാറിലെ പമ്പ ഇറിഗേഷൻ പദ്ധതിയുടെ ഡാമിൽ നിന്നാണ് ജലം ശേഖരിക്കുന്നത്. പമ്പ ഇറിഗേഷന്റെ മണിയാറിലെ സ്ഥലത്ത് 9 എംഎൽഡി ട്രീറ്റ്മെൻറ് പ്ലാൻറ് സ്ഥാപിക്കും. ഇവിടെനിന്നും 90 ലക്ഷം ലിറ്റർ വെള്ളമാണ് ശുദ്ധീകരിക്കുക. തുടർന്ന് വിവിധ സ്ഥലങ്ങളിലെ വിതരണ ടാങ്കുകളിൽ എത്തിക്കും.
ശുദ്ധീകരണ പ്ലാൻറ് നിന്നും പേഴുംപാറയിൽ 7 ലക്ഷം ലിറ്റർ ശേഷിയുള്ള ടാങ്കിലും താഴെ രണ്ട് ലക്ഷം ലിറ്റർ ശേഷിയുള്ള ഭൂതല ടാങ്കും നിർമ്മിക്കും. പത്താം ബ്ലോക്ക് , അയ്യപ്പ മെഡിക്കൽ കോളേജ്, എന്നിവിടങ്ങളിൽ 4.5 ലക്ഷം ലിറ്റർ ശേഷിയുള്ള ടാങ്കും സ്ഥാപിച്ചായിരിക്കും പഞ്ചായത്തിലെ ജലവിതരണം സുഗമമാക്കുക. വാട്ടർ അതോറിറ്റി പ്രോജക്ട് ഡിവിഷൻ വഴി നടപ്പാക്കുന്ന പദ്ധതി വഴി വടശ്ശേരിക്കര പഞ്ചായത്തിൽ മാത്രം 33205 കണക്ഷനുകൾ നൽകും. കൂടാതെ നിലവിലുള്ള പദ്ധതികളായ അടിച്ചിപ്പുഴ പദ്ധതിവഴി 500 കണക്ഷനുകളും റാന്നി മേജർ കുടിവെള്ള പദ്ധതി വഴി 100 കണക്ഷനുകളും ചിറ്റാറിൽനിന്നും ഉള്ള പദ്ധതി വഴി 50 കണക്ഷനുകളും നൽകും. ഇതിനായി 9.20 കോടി രൂപയും വകയിരുത്തിയിട്ടുണ്ട്. പദ്ധതി പൂർത്തിയാകുന്നതോടെ റാന്നി നിയോജകമണ്ഡലത്തിലെ ഉയർന്ന പ്രദേശങ്ങളായ മുക്കുഴി, പേഴും പാറ , മങ്ങാട് മല ഉൾപ്പെടെയുള്ള ഭാഗങ്ങളിൽ ജലവിതരണം ഉറപ്പാക്കാനാകും.
