ന്യൂജേഴ്സി : മലയാളി വിദ്യാര്ത്ഥി അമേരിക്കയില് മുങ്ങി മരിച്ചു. ന്യൂജേഴ്സിയിലെ ന്യൂമില്ഫോര്ഡില് താമസിക്കുന്ന പത്തനംതിട്ട നിരണം സ്വദേശി ക്ലിന്റണ് അജിത്താണ് (18) മരിച്ചത്. കുളത്തില് വീണ പന്തെടുക്കാന് ഇറങ്ങിയപ്പോഴാണ് അപകടം എന്നാണ് വിവരം. അമേരിക്കന് സമയം വെള്ളിയാഴ്ച്ച വൈകുന്നേരം ഏഴ് മണിക്കാണ് സംഭവം. ഒരു കൂട്ടം കുട്ടികള് ഫുട്ബോള് കളിക്കുന്നതിനിടെ അറിയാതെ പന്തടിച്ച് കുളത്തില് വീഴുകയും ക്ലിന്റണ് അതെടുത്ത് തരാമെന്ന് പറഞ്ഞ് ഇറങ്ങുകയായിരുന്നു എന്നും അമേരിക്കന് മാധ്യമമായ ഡെയിലി വോയിസ് റിപ്പോര്ട്ട് ചെയ്തു.
നീന്താന് അറിയാത്ത ക്ലിന്റണ് തണുത്ത വെള്ളത്തില് ഇറങ്ങിയതോടെ മുങ്ങി പോവുകയായിരുന്നു. എമര്ജന്സി സര്വീസ് അധികൃതര് എത്തി ക്ലിന്റണെ കുളത്തില് നിന്നും കയറ്റിയെങ്കിലും ജീവന് രക്ഷിക്കാനായില്ല. 2012 ലാണ് ക്ലിന്റണ് അജിത്തും കുടുംബവും യുഎസില് താമസമാക്കിയത് എന്നാണ് അറിയുന്നത്.