തിരുവനന്തപുരം : വെമ്പായത്ത് മദ്യലഹരിയില് വാഹനമോടിച്ച് അപകടമുണ്ടാക്കിയ കോടതി ജീവനക്കാര് ഉള്പ്പെടുന്ന സംഘത്തെ നാട്ടുകാര് പിടിച്ച് പോലീസിലേല്പ്പിച്ചു. അച്ഛനും മകളും യാത്രചെയ്ത ബൈക്ക് ഇടിച്ചിട്ട ശേഷം നിര്ത്താതെ പോയതോടെയാണ് നാട്ടുകാര് പിന്തുടര്ന്ന് തടഞ്ഞത്. വെമ്പായം ജംഗ്ഷനില് രാത്രി 8.30ഓടെ ബൈക്കില് പോവുകയായിരുന്ന അച്ഛനെയും മകളെയും ഇടിച്ചിട്ട ശേഷം നിര്ത്താതെ പോയ കാറാണ് നാട്ടുകാര് പിന്തുടര്ന്ന് തടഞ്ഞത്. ഇതിനിടെ, നാട്ടുകാര് പിന്തുടരുന്നുണ്ടെന്ന് അറിഞ്ഞ സംഘം അപകടകരമായ രീതിയില് വാഹനമോടിച്ച് ഭീതിപടര്ത്തി.
വാഹനത്തിലുണ്ടായിരുന്ന മദ്യകുപ്പികള് വാഹനത്തിലിരുന്ന് മദ്യപിച്ച സംഘം റോഡിലേക്ക് വലിച്ചെറിഞ്ഞു. തിരുവനന്തപുരം ജില്ലാ കോടതിയിലെ ജീവനക്കാരന് ടി.സുരേഷ് കുമാര്, ഗോപകുമാര്, ശശികുമാര്, പ്രഭകുമാര് എന്നിവരാണ് വാഹനത്തിലുണ്ടായിരുന്നത്. വാഹനം തടഞ്ഞുനിര്ത്തിയ നാട്ടുകാര് പോലീസിനെ വിവരം അറിയിച്ചു. കോടതി ജീവനക്കാരാണെന്ന് സ്വയം പരിചയപ്പെടുത്തിയ സംഘത്തെ കസ്റ്റഡിയിലെടുത്ത പോലീസ് വാഹനവും പിടിച്ചെടുത്തു. അപകടത്തില്പ്പെട്ട് പരുക്കേറ്റ വെമ്പായം സ്വദേശികളായ പ്രേം ലാലിനെയും മകള് ആരതിലാലിനെയും കന്യാകുളങ്ങര ആശുപത്രിയില് പ്വേശിപ്പിച്ചു.
