കുന്നന്താനം : സിൽവർ ലൈൻ പദ്ധതിയുടെ സാമൂഹ്യ ആഘാത പഠനത്തിന് സർവേ നടത്താൻ ഹൈക്കോടതി നൽകിയ അനുമതി പദ്ധതിക്കുള്ള അനുമതിയാണെന്ന് നുണപ്രചരണം നടത്തി തെറ്റിദ്ധാരണ പരത്താനാണു സർക്കാരും കെ – റെയിൽ അധികൃതരും ശ്രമിക്കുന്നതെന്ന് കേരള കോൺഗ്രസ് വൈസ് ചെയർമാൻ ജോസഫ് എം. പുതുശ്ശേരി ആരോപിച്ചു. പദ്ധതി സാമൂഹ്യ ആഘാതം സൃഷ്ടിക്കില്ലെന്ന് പഠനറിപ്പോർട്ടിൽ വ്യക്തമായെങ്കിൽ മാത്രമേ പദ്ധതിയുമായി മുന്നോട്ടു പോകാനാവൂ. കേരളം കണ്ടിട്ടുള്ളതിൽ വെച്ച് ഏറ്റവും വലിയ കുടിയിറക്കിന് കാരണമാകുന്ന പദ്ധതി സാമൂഹ്യ ആഘാതം സൃഷ്ടിക്കില്ല എന്ന് ആർക്കാണ് പറയാൻ കഴിയുക. ഓരോ ദിവസം കഴിയുംതോറും സിൽവർലൈൻ സംബന്ധിച്ച ദുരൂഹതകൾ ഒന്നിനുപുറകെ ഒന്നായി പുറത്തു വരികയാണെന്നും കുരുക്ക് കൂടുതൽ മുറുകുകയാണെന്നും പുതുശ്ശേരി പറഞ്ഞു.
കെ – റെയിൽ പദ്ധതി ഉപേക്ഷിക്കണമെന്ന് ആവശ്യപ്പെട്ട് കൊണ്ട് മാടപ്പള്ളി കാരക്കാട് പാടിയിൽ കെ – റെയിൽ വിരുദ്ധ ജനകീയ സമിതി നടത്തിയ സമര സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സമിതി ജില്ലാ ചെയർമാൻ ബാബു കുട്ടൻചിറ അധ്യക്ഷത വഹിച്ചു. ഫാ. ജോൺസൺ വർഗീസ്, വി. ജെ. ലാലി, സുധാ കുര്യൻ, മിനി കെ. ഫിലിപ്പ്, മാത്തുക്കുട്ടി പ്ലാത്താനം, ജി. അശോക്, ബാബു കുരീത്ര, സൈന തോമസ്, വർഗീസ് ആന്റണി, ജിൻസൺ മാത്യു തുടങ്ങിയവർ പ്രസംഗിച്ചു.
