പത്തനംതിട്ട : ഏപ്രില് 27,28,29,30 തീയതികളില് പത്തനംതിട്ടയില് നടക്കുന്ന ഡി.വൈ.എഫ്.ഐ സംസ്ഥാന സമ്മേളനത്തിന് ആദ്യ സംഭാവനയായി ലഭിച്ചത് മുന് നേതാവിന്റെ വിവാഹമോതിരം. ഡി.വൈ.എഫ്.ഐയുടെ ജില്ലയിലെ ആദ്യ പ്രസിഡന്റ് എ.പത്മകുമാര് ആണ് ഇന്നലെ നടന്ന ജില്ലാതല സംഘാടകസമിതി രൂപീകരണ യോഗത്തില് വിവാഹമോതിരം സംഭാവനായി നല്കിയത്. മോതിരം ജില്ലാസെക്രട്ടറി പി.ബി.സതീഷ് കുമാര് ഏറ്റുവാങ്ങി.
പത്തനംതിട്ടയില് ആദ്യമായി സംസ്ഥാന സമ്മേളനം നടക്കുമ്പോള് ഏറെ പ്രിയപ്പെട്ടത് എന്തെങ്കിലും സംഭാവനയായി നല്കണമെന്ന് ആഗ്രഹിച്ചിരുന്നു. ഭാര്യ മിനിയുമായി ആലോചിച്ച് തീരുമാനിച്ചപ്രകാരം ആണ് വിവാഹമോതിരം നല്കിയതെന്ന് പത്മകുമാര് പറഞ്ഞു. മുന് തിരുവിതാംകൂര് ദേവസ്വം ബോര്ഡ് പ്രസിഡന്റും സി.പി.എം പത്തനംതിട്ട ജില്ലാ സെക്രട്ടേറിയറ്റംഗവുമായ എ.പത്മകുമാര് 1985 സെപ്തംബര് 16നാണ് പ്രണയിച്ച് വിവാഹിതനായത്. ആറന്മുള സത്രത്തിലായിരുന്നു വിവാഹച്ചടങ്ങ്. അന്ന് സി.പി.എം ജില്ലാ സെക്രട്ടറിയായിരുന്ന പി.രാമകൃഷ്ണന് മിനിയുടെ കൈയില് മോതിരം നല്കിയിട്ട് ഇത് അവന്റെ കൈയില് ഇടാന് പറഞ്ഞു. ആ മോതിരമാണ് ഇന്നലെ പത്മകുമാര് സംഭാവനയായി ഡി.വൈ.എഫ്.എെക്ക് നല്കിയത്.
1982 മുതല് 1986 വരെ ജില്ലാ പ്രസിഡന്റ് ആയിരുന്നു ആറന്മുള കീച്ചംപറമ്ബില് എ.പത്മകുമാര്. 1987 ആഗസ്റ്റ് 15 ലെ ദേശീയ ഐക്യത്തിനായുള്ള മനുഷ്യച്ചങ്ങലയായിരുന്നു മറക്കാനാവാത്ത സംഘാടനാനുഭവം. ശേഷം ഡി.വൈ.എഫ്.ഐ സംസ്ഥാന വൈസ് പ്രസിഡന്റും കേന്ദ്ര എക്സിക്യൂട്ടീവ് അംഗവുമായി. കോന്നി മണ്ഡലത്തെ പ്രതിനിധീകരിച്ച് നിയമസഭയിലുമെത്തി. മക്കള് : ജയശ്രീ, ജയശങ്കര്, ജയസൂര്യ.