തിരുവനന്തപുരം: വ്ളോഗര്മാര്ക്കെതിരെ നിയമനടപടികള് സ്വീകരിക്കണമെന്ന് ഡിവൈഎഫ്ഐ. സ്ത്രീ വിരുദ്ധവും സാമൂഹ്യ വിരുദ്ധവുമായ കണ്ടന്റുകള് ചെയ്യുന്ന വ്ളോഗര്മാര്ക്കെതിരെയാണ് ഡിവൈഎഫ്ഐ രംഗത്ത് എത്തിയിരിക്കുന്നത്. വീഡിയോ പ്ലാറ്റ്ഫോമുകളിലെ ഉള്ളടക്കങ്ങളെ സംബന്ധിച്ചും, കുട്ടികളുടെ സോഷ്യല്മീഡിയ ഉപയോഗത്തെ സംബന്ധിച്ചും മാനദണ്ഡങ്ങള് കൊണ്ടുവരണമെന്നും ഡിവൈഎഫ്ഐ സംസ്ഥാന സെക്രട്ടറിയേറ്റ് ആവശ്യപ്പെട്ടു. മൊബൈല് ഫോണില് യാതൊരു നിയന്ത്രണവുമില്ലാതെ ഏത് തരം വീഡിയോകളും ലഭിക്കുകയാണ്.
ഏത് വിധേനയും ജനശ്രദ്ധ നേടുക, എന്ത് ചെയ്തും പ്രശസ്തിയും പണവും നേടുക എന്നതുമാണ് ഇത്തരം കണ്ടന്റുകള്ക്ക് പിന്നില്. സ്ത്രീ വിരുദ്ധതയും തെറി വിളിയും അശ്ലീല പദപ്രയോഗങ്ങളുമായി പേരെടുത്ത ഒരാളുടെ അഭിമുഖങ്ങള് നടത്തുന്നവരും, ഉദ്ഘാടനത്തിന് കൊണ്ടുവരുന്നവരും എന്ത് തരം സന്ദേശമാണ് പൊതു സമൂഹത്തിന് നല്കുന്നതെന്ന് ആലോചിക്കണമെന്നും ഡിവൈഎഫ്ഐ ആവശ്യപ്പെട്ടു. ഗുണപരമായ പല മാറ്റങ്ങളും നില നില്ക്കുമ്പോള് തന്നെ മറ്റൊരു വിഭാഗം വളരെ പിന്തിരിപ്പനും അരാഷ്ട്രീയവും, സ്ത്രീ – ദളിത് വിരുദ്ധവും, ആധുനിക മൂല്യങ്ങള്ക്കെതിരെ പൊതു ബോധം നിര്മ്മിക്കുന്നതുമായ വീഡിയോകള് ഉല്പ്പാദിപ്പിക്കുകയാണ്. ചിന്താ ശേഷിയില്ലാത്ത കുറേപേര് ഇതിനെ പിന്തുണക്കുകയും ചെയ്യുന്നു. നിര്ഭാഗ്യവശാല് ഇത്തരക്കാര്ക്ക് പ്രായപൂര്ത്തിയാവാത്ത കുട്ടികള് ഉള്പ്പെടെയുള്ളവരാണ് ഫോളോവര്മാരാവുന്നത് എന്നത് വിഷയത്തിന്റെ ഗൗരവം വര്ദ്ധിപ്പിക്കുന്നു. കഴിഞ്ഞ ദിവസങ്ങളില് പൊതുജന ശ്രദ്ധയില് പെട്ട ‘തൊപ്പി’ എന്നറിയപ്പെടുന്ന യൂ ട്യൂബര് ചെയ്യുന്ന വീഡിയോകളുടെ ഉള്ളടക്കം ഇത്തരത്തില് പെട്ടതാണെന്നും ഡിവൈഎഫ്ഐ പറയുന്നു.
