റാന്നി: സെന്റ് തോമസ് കോളേജിൽ സ്കൂൾ – കോളേജ് വിദ്യാർത്ഥികൾക്കും പൊതുജനങ്ങൾക്കുമായി 12,13 തീയതികളിൽ ഇക്കോസൈനോവ -2കെ26 എന്ന പേരിൽ നടത്തുന്ന എക്സിബിഷന്റെ പ്രചരണാർത്ഥം ഇട്ടിയപ്പാറ, പെരുമ്പുഴ ബസ് സ്റ്റാൻഡുകളിൽ കോളേജ് യൂണിയന്റെ നേതൃത്വത്തിൽ ഫ്ലാഷ് മോബ് നടത്തി. കോളേജ് മാനേജർ പ്രൊഫ. റോയി മേലേൽ, പ്രിൻസിപ്പാൾ ഡോ.സ്നേഹ എൽസി ജേക്കബ്, ജനറൽ കൺവീനർ ഡോ.എം.കെ.സുരേഷ് എന്നിവർ സംസാരിച്ചു. വിദ്യാർത്ഥികളിൽ ശാസ്ത്രീയ അവബോധം വളർത്തുകയും നവീകരണചിന്തകൾക്ക് പ്രചോദനം നൽകുകയും സുസ്ഥിര വികസനത്തിന്റെ പ്രാധാന്യം പൊതു സമൂഹത്തിലേക്ക് എത്തിക്കുകയും ചെയ്യുകയാണ് ഈ ശാസ്ത്രപ്രദർശനത്തിന്റെയും വിജ്ഞാനോത്സവത്തിന്റെയും മുഖ്യലക്ഷ്യം.
പരിപാടിയുടെ ഭാഗമായി ഐ.എസ്.ആർ.ഒ, വനം വകുപ്പ്, മിൽമ തുടങ്ങിയ സ്ഥാപനങ്ങളുടെ പ്രദർശന സ്റ്റാളുകൾ, വളർത്തുമൃഗങ്ങളുടെയും പക്ഷികളുടെയും പ്രദർശനം, വെർച്വൽ റിയാലിറ്റി അനുഭവം, ഫോട്ടോ പ്രദർശനം, വാനനിരീക്ഷണം (12 ന് വൈകിട്ട് 6.00 മുതൽ 9.00 വരെ), വിവിധ മേഖലകളിൽ നിന്നുള്ള പ്രദർശനങ്ങൾ തുടങ്ങിയവ ഒരുക്കിയിട്ടുണ്ട്. കൂടാതെ കോളേജിലെ വിവിധ ഡിപ്പാർട്ട്മെന്റുകൾ ഒരുക്കുന്ന പ്രദർശനവും ഉണ്ടായിരിക്കുന്നതാണ്. 13 ന് സ്കൂൾ വിദ്യാർത്ഥികൾക്ക് അവരുടെ പ്രദർശന മോഡലുകൾ അവതരിപ്പിക്കാനുള്ള അവസരം ഉണ്ടായിരിക്കുന്നതാണ്. തിരഞ്ഞെടുക്കപ്പെടുന്ന മികച്ച മോഡലുകൾക്ക് ക്യാഷ് പ്രൈസ് നൽകുന്നതാണ്. എല്ലാ വിദ്യാർത്ഥികൾക്കും പൊതുജനങ്ങൾക്കും സൗജന്യമായി ഈ പരിപാടിയിൽ പങ്കെടുക്കാവുന്നതാണ്
