പത്തനംതിട്ട : പോപ്പുലര് നിക്ഷേപത്തട്ടിപ്പ് കേസില് ഉടമകളെ ഇന്ന് എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്യും. തിരുവനന്തപുരത്ത് ജയിലിലാണ് ചോദ്യം ചെയ്യല്. ഉടമകളായ തോമസ് ഡാനിയേല്(റോയി ), പ്രഭാ തോമസ്, റിനു മറിയം, റിബ മറിയം എന്നിവരെയാണ് ചോദ്യം ചെയ്യുന്നത്. ഇന്നലെ പോലീസ് കസ്റ്റഡി അവസാനിച്ചതിനെ തുടര്ന്നു പ്രതികളെ ജയിലുകളില് തിരികെ എത്തിച്ചു.
പോപ്പുലറിന്റെ വെളിപ്പെട്ടതും വെളിപ്പെടാത്തതുമായ മുഴുവന് സ്വത്തുക്കളുടെയും വിവരങ്ങള് എന്ഫോഴ്സ്മെന്റ് ഡയറക്ടറേറ്റ് ശേഖരിച്ചു തുടങ്ങി. ഇഡിയുടെ കൊച്ചി യൂണിറ്റാണ് പോപ്പുലര് കേസ് കൈകാര്യം ചെയ്യുന്നത്. കോവിഡ് ബാധിതയായ റിയയുടെ ചോദ്യം ചെയ്യല് സംബന്ധിച്ചു തീരുമാനം ഇന്നുണ്ടാകും. 5 ദിവസമാണ് പ്രതികള് ഇഡി കസ്റ്റഡിയില് ഉണ്ടാവുക. പോപ്പുലറുമായി ബന്ധപ്പെട്ട് രാജ്യത്തും പുറത്തും എവിടെയെല്ലാം വസ്തുവകകള് ഉണ്ടെന്നതിന്റെ അന്വേഷണമാണ് ഇപ്പോള് ഇഡി പൂര്ത്തിയാക്കുന്നത്. കൈമാറിയ സ്വത്തുക്കള് സംബന്ധിച്ച വിവരവും ഉദ്യോഗസ്ഥര് ശേഖരിച്ചിട്ടുണ്ട്. ബെനാമി പേരുകളിലെ സ്വത്തുക്കളും രാജ്യത്തിനു പുറത്തേക്കു കടത്തിയ സ്വത്തുക്കളും സംബന്ധിച്ച വ്യക്തമായ രൂപരേഖ അന്വേഷണ സംഘം തയാറാക്കുകയാണ്.
