കൊച്ചി : ഇടമലയാര്‍ ആനക്കൊമ്പ് കേസിലെ പ്രതികളുടെ 79.23 ലക്ഷത്തിന്റെ സ്വത്ത് എന്‍ഫോഴ്സ്മെന്റ് ഡയറക്ടറേറ്റ് കണ്ടുകെട്ടി. പ്രതികളായ ഉമേഷ് അഗര്‍വാള്‍, ഡി.രാജന്‍, ഇവരുടെ ഭാര്യമാര്‍ എന്നിവരുടെ സ്വത്തുക്കളും മറ്റ് രണ്ട് പ്രതികളായ അജി ബ്രൈറ്റ്, പ്രീസ്റ്റണ്‍ സില്‍വ എന്നിവരുടെ ഭാര്യമാരുടെ സ്വത്തുക്കളുമാണ് കണ്ടുകെട്ടിയത്. മൂന്നാര്‍, വാഴച്ചാല്‍, മലയാറ്റൂര്‍ വനമേഖലകളിലായി ആനവേട്ട നടത്തി ആനക്കൊമ്പ് കേരളത്തിന് പുറത്ത് വിറ്റെന്നായിരുന്നു കേസ്. ഇടമലയാര്‍, കരിമ്പാനി ഫോറസ്റ്റ് സ്റ്റേഷനുകള്‍ രജിസ്റ്റര്‍ ചെയ്ത കേസുകളുടെ അടിസ്ഥാനത്തിലാണ് കള്ളപ്പണം വെളുപ്പിക്കല്‍ നിയമവുമായി ബന്ധപ്പെട്ട് ഇ.ഡി അന്വേഷണം ആരംഭിച്ചത്.
റിസര്‍വ് വനത്തില്‍ അതിക്രമിച്ച്‌ കയറല്‍, കാട്ടാനകളെ വേട്ടയാടല്‍, കൊമ്പുകള്‍ നീക്കം ചെയ്യല്‍, ആനക്കൊമ്പ് ഉല്‍പന്നങ്ങളുടെ അനധികൃത വ്യാപാരം എന്നിങ്ങനെയായിരുന്നു പ്രതികള്‍ക്കെതിരെ ഫോറസ്റ്റ് അധികൃതര്‍ ചുമത്തിയ കുറ്റം. അന്വേഷണത്തില്‍ പ്രതികള്‍ 79.23 ലക്ഷം രൂപ അനധികൃതമായി സമ്പാദിച്ചെന്ന് കണ്ടെത്തിയതിന്റെ അടിസ്ഥാനത്തിലാണ് സ്വത്ത് കണ്ടുകെട്ടിയതെന്ന് എന്‍ഫോഴ്സ്മെന്റ് ഡയറക്ടറേറ്റ് അധികൃതര്‍ വ്യക്തമാക്കി.
