തിരുവനന്തപുരം : നിരവധി മോഷണക്കേസിലെ പ്രതിയായ വയോധികൻ അറസ്റ്റിൽ. തിരുവനന്തപുരം നെടുമങ്ങാട് സ്വദേശി പ്രഭാകരൻ (73) ആണ് അറസ്റ്റിലായത്. കഴിഞ്ഞ 13ാം തീയതി രാത്രി രണ്ട് മണിക്ക് ബേക്കറി കുത്തിത്തുറന്ന് മോഷണം നടത്തിയ കേസിലാണ് ഇപ്പോൾ പ്രഭാകരനെ പോലീസ് അറസ്റ്റ് ചെയിതിരിക്കുന്നത്. നെടുമങ്ങാട് സ്വദേശിനി ബിനിയും സുഹൃത്തുക്കളും ചേർന്ന് മുക്കോല ജങ്ഷനിൽ നടത്തുന്ന ബേക്കറിയിൽ നടത്തിയ മോഷണത്തിലാണ് പ്രഭാകരൻ പിടിയിലായത്.
കടയുടെ ഷട്ടർ പൊളിച്ചാണ് ഇയാൾ അകത്തുകയറിയത്. ക്യാഷ് കൗണ്ടറിൽ സൂക്ഷിച്ചിരുന്ന പണവും വിലപിടിപ്പുള്ള ബേക്കറി സാധനങ്ങളും മോഷ്ടിച്ചു. സി.സി.ടി.വി ക്യാമറകൾ കേന്ദ്രീകരിച്ചു നടത്തിയ അന്വേഷണത്തിലാണ് പ്രതി അറസ്റ്റിലായത്. നെടുമങ്ങാട് സ്റ്റേഷൻ പരിധിയിൽ നിരവധി അബ്കാരി കേസുകളിലും ഇയാൾ പ്രതിയാണ്. നെടുമങ്ങാട് സി.ഐ സന്തോഷ് കുമാർ, എസ്.ഐ മാരായ സുനിൽഗോപി, സുരേഷ്കുമാർ, എ.എസ്.ഐ രൂപേഷ്കുമാർ, സി.പി.ഒ സജു എന്നിവർ ചേർന്നാണ് പ്രതിയെ അറസ്റ്റു ചെയ്തത്.
