ഹൈദരാബാദ് : 85 കാരനെ കാണാനില്ലെന്ന വീട്ടുകാരുടെ പരാതിക്കൊടുവില് ഒരു രാത്രിക്ക് ശേഷം സ്ഥലത്തെ യൂണിയന് ബാങ്കിലെ ലോക്കര് മുറിയില് നിന്നും കണ്ടെത്തി. ജൂബിലി ഹില്സ് റോഡില് താമസിക്കുന്ന 85 വയസ്സുകാരനായ വി.കൃഷ്ണ റെഡ്ഡി തിങ്കളാഴ്ച വൈകിട്ട് 4.30 യോടെയാണ് ലോക്കറില് സൂക്ഷിച്ചിരുന്ന സാധനങ്ങള് തിരിച്ചെടുക്കുന്നതിനായി ബഞ്ചാര ഹില്സിലെ ബാങ്കിലെത്തിയത്. പരിശോധനക്ക് ശേഷം അദ്ദേഹത്തെ ലോക്കര് മുറിയിലേക്കയച്ചു. ബാങ്ക് അടക്കാനുള്ള സമയമായ വിവരം റെഡ്ഢിയെ ജീവനക്കാര് അറിയിച്ചിരുന്നില്ല. ബാങ്കിലെ സെക്യൂരിറ്റി ജീവനക്കാര് ലോക്കര് മുറിയിലുള്ള റെഡ്ഡിയെ ശ്രദ്ധിക്കാതെ അബദ്ധത്തില് ബാങ്ക് അടക്കുകയായിരുന്നു.
ബാങ്ക് ജീവനക്കാരുടെ അനാസ്ഥമൂലം ഒരു രാത്രി മുഴുവന് ബാങ്കിലെ ലോക്കര് മുറിയില് കുടുങ്ങി കിടന്ന റെഡ്ഡിയെ പിറ്റേ ദിവസം രാവിലെയാണ് രക്ഷപ്പെടുത്താന് സാധിച്ചത്. ചൊവ്വാഴ്ച രാവിലെ 10.30ന് ജീവനക്കാരന് ലോക്കര് മുറി തുറന്നപ്പോഴാണ് ഇദ്ദേഹം മുറിയില് കുടുങ്ങി കിടക്കുകയായിരുന്നു എന്ന് മനസ്സിലായത്. സമയം ഏറെ വൈകിയിട്ടും റെഡ്ഡി തിരിച്ചെത്താത്തതില് പരിഭ്രാന്തരായ ബന്ധുക്കള് ജൂബിലി ഹില്സ് പോലീസ് സ്റ്റേഷനില് പരാതി നല്കിയിരുന്നു. പ്രമേഹമുള്പ്പടെ മറ്റ് പല അസുഖങ്ങളും ഉള്ളതിനാല് അവശനിലയിലായിരുന്ന റെഡ്ഡിയെ പോലീസെത്തി ആശുപത്രിയിലേക്ക് മാറ്റി.
