പാലക്കാട് : വാളയാറിലെ സിപിഎം നേതാവ് മുഹമ്മദ് റാഫിയുടെ അറസ്റ്റിനു പിന്നാലെ, അനധികൃത സ്വത്തു സമ്പാദന കേസില് ക്രൈംബ്രാഞ്ച് കോഴിക്കോട് ഡി.വൈ.എസ്.പി എം.ഹംസ ഉള്പ്പെടെ 3 പേര്ക്കെതിരെക്കൂടി സ്പെഷല് വിജിലന്സ് സെല് കേസെടുത്തു. എം.ഹംസ, ഭാര്യ, ബന്ധു റഷീദ് എന്നിവര്ക്കെതിരെയാണു കേസെടുത്ത് അറസ്റ്റ് വാറണ്ട് പുറപ്പെടുവിപ്പിച്ചത്. 2019 ഓഗസ്റ്റ് 14നാണു ഹംസയ്ക്കെതിരെ അനധികൃത സ്വത്തു സമ്പാദനത്തിനും അഴിമതിക്കും വിജിലന്സ് കേസെടുത്തത്. നേരത്തെ, ഹംസയുടെ ചെര്പ്പുളശ്ശേരിയിലെ വീട് വിജിലന്സ് റെയ്ഡ് ചെയ്ത് ഒട്ടേറെ മുദ്രപ്പത്രങ്ങളും ആധാരങ്ങളും വസ്തു ഇടപാടു നടത്തിയ രേഖകളും കണ്ടെടുത്തിരുന്നു. പരിശോധനയ്ക്കിടെ, ഹംസ ഓടി രക്ഷപ്പെടാന് ശ്രമിച്ചിരുന്നു.
ഭൂമി തിരിമറിക്കു വ്യാജരേഖയുണ്ടാക്കിയതും ഇടപാടുകള് നടത്തിയതും സിപിഎം നേതാവ് മുഹമ്മദ് റാഫിയും റഷീദും ചേര്ന്നാണെന്നു വിജിലന്സ് പറയുന്നു. ഇതിനായി, മുദ്രപ്പത്രങ്ങള് ഇവര് വ്യാജമായി ഉണ്ടാക്കി. മരിച്ചയാളുടെ പേരില് വരെ മുദ്രപ്പത്രങ്ങള് വാങ്ങിക്കൂട്ടിയാണു തട്ടിപ്പു നടത്തിയത്. വ്യാജ സീലുകള് ഉണ്ടാക്കി നല്കിയത് പുതുശ്ശേരി സ്വദേശിയായ സാബുവാണെന്ന് ഇന്നലെ അറസ്റ്റിലായ, മുഹമ്മദ് റാഫി വിജിലന്സിന്റെ ചോദ്യം ചെയ്യലില് വെളിപ്പെടുത്തി. സിപിഎം ലോക്കല് കമ്മിറ്റി അംഗവും പുതുശ്ശേരി പഞ്ചായത്ത് മുന് അംഗവുമായ മുഹമ്മദ് റാഫിയെ കഴിഞ്ഞ ദിവസമാണു കൊച്ചിയില് നിന്നുള്ള സ്പെഷല് വിജിലന്സ് യൂണിറ്റ് അറസ്റ്റ് ചെയ്തത്. എന്നാല്, ഡി.വൈ.എസ്.പി ഉള്പ്പെടെ മൂവരും ഒളിവില് പോയെന്നാണു വിജിലന്സ് ഉദ്യോഗസ്ഥര് പറയുന്നത്. ഇവരുടെ മൊബൈല് ഫോണുകള് സ്വിച്ച് ഓഫാണ്.
