തിരുവല്ല : എട്ടു കിലോ കഞ്ചാവുമായി എത്തിയ യുവാവിനെ ഷാഡോ പോലീസ് തിരുവല്ല റെയില്വേ സ്റ്റേഷനില്നിന്നും അറസ്റ്റ് ചെയ്തു. പത്തനംതിട്ട വലഞ്ചുഴി മുരിപ്പേല് പുത്തന് വീട്ടില് സഫദ് മോന് (27) ആണ് ബുധനാഴ്ച പുലര്ച്ചെ പിടിയിലായത്. പുലര്ച്ചെ 4.30ന് എത്തിയ ചെന്നൈ മെയിലിലെ യാത്രക്കാരനായിരുന്നു സഫദ്. ട്രെയിനിറങ്ങി പുറത്തേക്ക് വന്ന സഫദിനെ വാഹന പാര്ക്കിങ് ഏരിയയില് വെച്ച് ഷാഡോ സംഘം വളഞ്ഞിട്ട് പിടികൂടുകയായിരുന്നു. എസ്.പിക്ക് ലഭിച്ച രഹസ്യവിവരത്തെ തുടര്ന്നായിരുന്നു അറസ്റ്റ്. രണ്ട് പായ്ക്കറ്റുകളിലായി ട്രാവല് ബാഗില് ഒളിപ്പിച്ച നിലയിലാണ് പ്രതിയില്നിന്നും കഞ്ചാവ് പിടികൂടിയത്. ആന്ധ്രയില് നിന്നുമാണ് കഞ്ചാവ് വാങ്ങിയതെന്ന് ഇയാള് പോലീസില് മൊഴി നല്കി.
ആര്.ഡി.ഒ കെ.ചന്ദ്രശേഖരന് പിള്ളയുടെ സാന്നിധ്യത്തില് മേല്നടപടി പൂര്ത്തിയാക്കിയശേഷം പ്രതിയെ കഞ്ചാവടക്കം തിരുവല്ല പോലീസിന് കൈമാറി. കഴിഞ്ഞ രണ്ട് വര്ഷക്കാലമായി ഇതര സംസ്ഥാനങ്ങളില്നിന്നും കഞ്ചാവ് എത്തിച്ചിരുന്ന സഫദ് ആദ്യമായാണ് പിടിയിലാകുന്നത്. ഷാഡോ പോലീസ് എസ്.ഐ വില്സണ്, എ.എസ്.ഐ അജികുമാര്, സി.പി.ഒ മാരായ സുജിത്ത്, മിഥുന് ജോസ്, അഖില്, ശ്രീരാജ്, ബിനു എന്നിവരടങ്ങുന്ന സംഘമാണ് പ്രതിയെ പിടികൂടിയത്.
