തിരുവനന്തപുരം : വീടുകളില് മീറ്റര്ഘടിപ്പിച്ച് വൈദ്യുതി വകുപ്പും ബോര്ഡും നടത്തുന്ന കവര്ച്ചയാണ് വൈദ്യുതി നിരക്ക് വര്ധനവെന്ന് എഐസിസി സംഘടനാ ചുമതലയുള്ള ജനറല് സെക്രട്ടറി കെ.സി.വേണുഗോപാല് എംപി. വൈദ്യുതി നിരക്ക് വര്ധനവ് വലിയ കൊള്ളയാണ്. ഇതു ജനങ്ങളോടുള്ള വെല്ലുവിളിയാണ്. വൈദ്യുതി ബോര്ഡിന്റെ കെടുകാര്യസ്ഥതയും ദുര്ച്ചെലവിനും പരിഹാരം കാണാന് ജനത്തെ പിഴിയുകയാണ്. മുഖ്യമന്ത്രിയും മന്ത്രിമാരും നടത്തുന്ന ധൂര്ത്ത് അഭംഗുരം തുടരുകയാണ്.അത് കുറയ്ക്കാതെ സര്ക്കാര് ഖജനാവില് വരുമാനമെത്തിക്കാന് വൈദ്യുതി നിരക്കും വെള്ളക്കരവും ഉള്പ്പെടെ വര്ധിപ്പിച്ച ജനത്തെ പിഴിയുകയാണ്. ഈ ജനദ്രോഹ നടപടിക്കെതിരെ ശക്തമായ പ്രക്ഷോഭം കോണ്ഗ്രസ് നടത്തുമെന്നും കെ.സി.വേണുഗോപാല് പറഞ്ഞു.
സ്മാര്ട്ട് സിറ്റി പദ്ധതി അവസാനിപ്പിക്കാനും ടീകോമിന് നഷ്ടപരിഹാരം നല്കാമുള്ള മന്ത്രി സഭാ തീരുമാനം കേരളത്തിലെ ചെറുപ്പക്കാരോട് കാട്ടിയ അനീതിയും ദ്രോഹവുമാണ്. ഈ പദ്ധതി പെട്ടന്ന് അവസാനിപ്പിക്കാനുള്ള സര്ക്കാര് തീരുമാനത്തിന് ഒരുപാട് ദുരൂഹതകളുണ്ട്. എന്തുകൊണ്ടാണ് ഇത്രയും വര്ഷക്കാലം കഴിഞ്ഞിട്ടും നിക്ഷേപം ആകര്ഷിക്കാനോ,തൊഴില് അവസരങ്ങള് സൃഷ്ടിക്കാനോ സാധിച്ചില്ല? സര്ക്കാര് വിശദീകരിക്കണം. 90000 പേര്ക്ക് തൊഴില് നല്കുമെന്ന പ്രതീക്ഷയില് തുടങ്ങിയ സംരംഭമാണ് അട്ടിമറിച്ചത്. കേരളത്തില് തൊഴിലവസരങ്ങളില്ലാത്തനിലാണ് ചെറുപ്പക്കാര് നാടുവിടുന്നതെന്നും കെ.സി.വേണുഗോപാല് കുറ്റപ്പെടുത്തി
