അടൂര് : അടൂര് നഗരസഭ പരിധിയില് തെരുവ് നായകള്ക്ക് അനധികൃതമായി സംരക്ഷണമൊരുക്കിയ സ്ത്രീയെ പോലീസ് അറസ്റ്റ് ചെയ്തു. നഗരസഭയിലെ പൊതു സ്ഥലങ്ങളില് അലഞ്ഞ് നടന്നിരുന്ന തെരുവ് നായകള്ക്ക് കോഴി മാലിന്യം ഉള്പ്പെടെ വാഹനത്തില് എത്തിച്ച് നല്കി വരികയായിരുന്നു ഇവര്. കഴിഞ്ഞ ദിവസം രാത്രിയില് ഇരുചക്ര വാഹനത്തില് തെരുവ് നായകള്ക്ക് ഭക്ഷണവുമായി എത്തിയ ഇവരെ സന്നദ്ധ പ്രവര്ത്തകരുടെ സഹായത്തോടെ നഗരസഭ ആരോഗ്യ വിഭാഗവും അടൂര് പോലീസും ചേര്ന്ന് പിടികൂടുകയായിരുന്നു.
അടൂര് ടൗണിൽ സ്കൂള് മേഖലയുള്പ്പെടുന്ന പ്രദേശത്ത് സന്ധ്യ സമയങ്ങളില് ഇവര് സ്ഥിരമായി എത്തി മാംസാവശിഷ്ടങ്ങള് നായകള്ക്ക് നല്കിയിരുന്നു. ഇതിനെതിരെ നിരവധി പരാതി ഉയര്ന്നിരുന്നു എങ്കിലും നടപടിയുണ്ടായിരുന്നില്ല. എന്നാല് കഴിഞ്ഞ ദിവസം അടൂര് നഗരത്തില് യുവാവിന് തെരുവ് നായയുടെ കടിയേറ്റതിനെ തുടര്ന്നാണ് അടൂര് നഗരസഭ അധികൃതര് ഈ വിഷയത്തില് ശ്രദ്ധ കേന്ദ്രീകരിക്കുകയും ഇവരെ പിടികൂടുകയും ചെയ്യുകയായിരുന്നു.
