കോന്നി: കൊക്കാത്തോട് കാഞ്ഞിരപ്പാറയില് കാട്ടാനയെ ചരിഞ്ഞ നിലയില് കണ്ടെത്തി. പന്നിപ്പടക്കം കടിച്ചതാണ് മരണകാരണമെന്നാണ് പ്രാഥമിക നിഗമനം. കൊക്കാത്തോട് കാഞ്ഞിരപ്പാറയിലെ വനമേഖലയിലെ തോട്ടില് ആണ് പത്ത് വയസ്സ് പ്രായമുള്ള കൊമ്പനാനയെ ചരിഞ്ഞ നിലയില് വനപാലകര് കണ്ടെത്തിയത്. കഴിഞ്ഞ ഒരാഴ്ചയായി വനപാലകരുടെ നിരീക്ഷണത്തില് ആയിരുന്നു ആന.
നടുവത്തുമൂഴി ഫോറെസ്റ്റ് റേഞ്ചില് കരിപ്പാന്തോട് ഫോറസ്റ്റേഷന് പരിധിയില് ആണ് സംഭവം നടന്നത്. വനത്തിലെ തോട്ടില് ആണ് ജഡം കണ്ടെത്തിയത്. കോന്നി ഫോറെസ്റ്റ് വെറ്റിനറി സര്ജന് ഡോ ശ്യാം ചന്ദ്രന്റെ നേതൃത്വത്തില് പോസ്റ്റ് മോര്ട്ടം നടപടികള് പൂര്ത്തിയാക്കി ജഡം മറവ് ചെയ്തു. പന്നിപ്പടക്കം കടിച്ചതിനെ തുടര്ന്ന് കീഴ്താടി എല്ലുകള്, പല്ല് എന്നിവ പൊട്ടിയ നിലയില് ആണ് ആനയുടെ ജഡം കണ്ടെത്തിയതെന്ന് പോസ്റ്റ്മോര്ട്ടം നടത്തിയ ഡോ ശ്യാം ചന്ദ്രന് പറഞ്ഞു. വനം വകുപ്പ് അധികൃതരുടെ നേതൃത്വത്തില് പോസ്റ്റ്മോര്ട്ടം നടപടികള് പൂര്ത്തീകരിച്ച ശേഷം ജഡം മറവ് ചെയ്തു.
