ശബരിമല : അയ്യപ്പസന്നിധിയിലെത്തുന്ന ഭക്തര്ക്ക് അടിയന്തിരഘട്ടത്തില് സേവന സന്നദ്ധരായി കാസര്ഗോഡ് നിന്നുള്ള എമര്ജന്സി സ്ട്രെച്ചര് ടീം. കാസര്ഗോഡ് നിന്ന് ഇരുപത് പേരാണ് സംഘത്തിലുള്ളത്. ശിവപ്രസാദിന്റെ നേതൃത്വത്തിലുള്ള സംഘം പാണ്ടിത്താവളത്തിനു സമീപമാണ് ഭക്തരെ സഹായിക്കാന് രംഗത്തുള്ളത്. കാനനപാത വഴിയെത്തുന്ന ഭക്തരില് അവശതയനുഭവിക്കുന്ന നിരവധി പേര്ക്കാണ് ഇവര് താങ്ങായത്.
വനംവകുപ്പിന്റെ ചെക്ക് പോസ്റ്റില് ലഭിക്കുന്ന സന്ദേശത്തിന്റെ അടിസ്ഥാനത്തിലാണ് കാനന പാതയില് അകപ്പെടുന്ന ഭക്തരെ ഇവര് അതിവേഗം സ്ട്രെച്ചറില് സുരക്ഷിത സ്ഥാനത്തെത്തിക്കുന്നത്. നാട്ടില് വിവിധ ജോലികളില് ഏര്പ്പെടുന്ന സംഘം തുച്ഛമായ ശമ്പളത്തിലാണ് ഇവിടെ സേവനത്തിനെത്തിയിരിക്കുന്നത്. എല്ലാ മലയാള മാസങ്ങളിലും നട തുറക്കുന്ന സമയത്ത് ഇവര് ശബരിമലയിലെത്തി ജോലി ചെയ്ത് മടങ്ങുമെന്ന് സംഘത്തിലുള്ള ശിവപ്രസാദ് പറഞ്ഞു. ദേവസ്വം ബോര്ഡിന്റെ നേതൃത്വത്തിലാണ് ഇവരുടെ പ്രവര്ത്തനങ്ങള് ഏകോപിപ്പിക്കുന്നത്.
