കൊല്ലങ്കോട്: മുതലമടയില്‍ എന്‍ഡോസള്‍ഫാന്‍ ഇരയായ യുവതി മരിച്ചു. മാമ്പള്ളം പാറമേട് കൃഷ്ണന്റെ മകള്‍ ആതിരയാണ് (20) മരിച്ചത്. ജനിച്ചത് മുതല്‍ കാലുകള്‍ക്ക് ചലനശേഷിയും സംസാരശേഷിയും ഉണ്ടായിരുന്നില്ല. ജില്ല ആശുപത്രിയില്‍ ചികിത്സക്കിടെയാണ് മരണം.
ചെറുപ്പം മുതല്‍ മാവിന്‍തോട്ടങ്ങളിലാണ് കൃഷ്ണന്റെ ജോലി. വിവാഹ സമയങ്ങളിലെല്ലാം തോട്ടങ്ങളില്‍ കീടനാശിനി തളിക്കുന്ന ജോലിയായിരുന്നുവെന്ന് കൃഷ്ണന്‍ പറഞ്ഞു. ഇപ്പോഴും തോട്ടങ്ങളിലാണ് ജോലി ചെയ്യുന്നത്. ഭാര്യ കമലവും കര്‍ഷകത്തൊഴിലാളിയാണ്. എന്‍ഡോസള്‍ഫാന്‍ ബാധിച്ചതാണ് ആതിരയുടെ ശാരീരിക പ്രശ്നങ്ങള്‍ക്ക് കാരണമെന്ന് എന്‍ഡോസള്‍ഫാന്‍ വിരുദ്ധ സമിതി പ്രസിഡന്റ് നീളപ്പാറ മാരിയപ്പന്‍ പറഞ്ഞു. വിദഗ്ധ പരിശോധന നടത്തണമെന്ന് ആവശ്യപ്പെട്ടു സര്‍ക്കാറിന് നിരവധി നിവേദനങ്ങള്‍ നല്‍കിയെങ്കിലും നടപടിയുണ്ടായില്ലെന്ന് പ്രവര്‍ത്തകര്‍ പറഞ്ഞു.
അതേസമയം ആതിരക്ക് എന്‍ഡോസള്‍ഫാന്‍ മൂലമാണ് രോഗമുണ്ടായതെന്ന് ആരോഗ്യവകുപ്പ് സ്ഥിരീകരിച്ചിട്ടില്ല. മൃതദേഹം തൊട്ടിയത്തറ ശ്മശാനത്തില്‍ സംസ്കരിച്ചു. സഹോദരിമാര്‍: അഞ്ജിത, അനിഷ.
