മോസ്കോ : യു.എസ് പ്രസിഡന്റ് ജോബൈഡന്റെ ഭാര്യ ജില്‍ ബൈഡനും മകളുമടക്കം 25 അമേരിക്കന്‍ പൗരന്‍മാരെ വിലക്കി റഷ്യ. കഴിഞ്ഞ ദിവസമാണ് റഷ്യന്‍ വിദേശകാര്യ മന്ത്രാലയം യു.എസ് പൗരന്‍മാരെ റഷ്യയില്‍ വിലക്കികൊണ്ടുള്ള നോട്ടീസ് പുറപ്പെടുവിച്ചത്. 25 അമേരിക്കക്കാര്‍ വിലക്കുള്ളവരുടെ പട്ടികയില്‍ ഉള്‍പ്പെട്ടതായി നോട്ടീസില്‍ പറ‍യുന്നു. റഷ്യന്‍ രാഷ്ട്രീയ-സാമൂഹിക വ്യക്തിത്വങ്ങള്‍ക്കെതിരെ അമേരിക്ക നിരന്തരം ഉപരോധ നടപടികള്‍ വ്യാപിപ്പിക്കുന്ന സാഹചര്യത്തില്‍ പ്രതികരണമെന്ന നിലയില്‍ റഷ്യ 25 അമേരിക്കന്‍ പൗരന്‍മാരെ വിലക്കി പട്ടിക പ്രസിദ്ധീകരിക്കുകയായിരുന്നു.
സൂസന്‍ കോളിന്‍സ്, മിച്ച്‌ മക്കോണല്‍, ചാള്‍സ് ഗ്രാസ്ലി, കിര്‍സ്റ്റണ്‍ ഗില്ലിബ്രാന്‍ഡ് എന്നിവരുള്‍പ്പടെ നിരവധി യു.എസ് സെനറ്റര്‍മാരും പട്ടികയില്‍ ഉള്‍പ്പെട്ടിട്ടുണ്ട്. കൂടാതെ യൂനിവേഴ്സിറ്റി പ്രഫസര്‍മാരും ഗവേഷകരും മുന്‍ അമേരിക്കന്‍ ഗവണ്‍മെന്റ് ഉദ്യോഗസ്ഥരും പട്ടികയില്‍ ഉള്‍പ്പെടുന്നു. യുക്രെയ്നില്‍ റഷ്യ ആക്രമണം നടത്തിയതോടെ അമേരിക്ക-റഷ്യ ബന്ധം വഷളാവുക‍യും റഷ്യക്കെതിരെ നിരവധി രാജ്യങ്ങള്‍ ഉപരോധം ഏര്‍പ്പെടുത്തുകയും ചെയ്തിരുന്നു.
