കോഴഞ്ചേരി: ലോക പരിസ്ഥിതി ദിനാചരണത്തോടനുബന്ധിച്ച് കേരളാ കോൺഗ്രസ് (എം) സംസ്കാരവേദിയുടെ നേതൃത്വത്തിൽ വിപുലമായ പരിപാടികൾ സംഘടിപ്പിച്ചു. സംസ്ഥാന വ്യാപകമായി 100 കേന്ദ്രങ്ങളിൽ വൃക്ഷത്തൈ നടീൽ, ക്യാഷ് അവാർഡ് വിതരണം, കവിയരങ്ങ് എന്നിവ പരിപാടിയുടെ ഭാഗമായി നടന്നു. കോഴഞ്ചേരി വൈ.എം.സി.എ ഹാളിൽ നടന്ന ചടങ്ങിൽ ഡോ.സാമൂവൽ മാർ ഐറേനിയോസ് തിരുമേനി പരിസ്ഥിതി ദിനാചരണ പരിപാടികളുടെ സംസ്ഥാനതല ഉദ്ഘാടനം നിർവ്വഹിച്ചു. പ്രകൃതിയെ സംരക്ഷിക്കേണ്ടത് വരുംതലമുറയോടുള്ള കടമയാണെന്നും പരിസ്ഥിതി സൗഹൃദപരമായ ജീവിതശൈലി ഓരോരുത്തരും ശീലമാക്കണമെന്നും അദ്ദേഹം ഉദ്ഘാടന പ്രസംഗത്തിൽ ഓർമ്മിപ്പിച്ചു.
സംസ്കാരവേദി സംസ്ഥാന പ്രസിഡന്റ് ഡോ.വർഗീസ് പേരയിൽ ചടങ്ങിൽ അധ്യക്ഷത വഹിച്ചു. ഹരിതകേരളം പദ്ധതികൾക്ക് ഊർജ്ജം പകരാൻ ലക്ഷ്യമിട്ടാണ് സംഘടന 100 കേന്ദ്രങ്ങളിൽ തൈ നടീൽ ചടങ്ങ് സംഘടിപ്പിച്ചതെന്ന് അദ്ദേഹം അധ്യക്ഷ പ്രസംഗത്തിൽ വ്യക്തമാക്കി. വിവിധ മേഖലകളിൽ മികവ് തെളിയിച്ചവർക്കുള്ള ക്യാഷ് അവാർഡ് വിതരണവും ചടങ്ങിൽ വെച്ച് നടന്നു. തുടർന്ന് പ്രമുഖ കവികൾ പങ്കെടുത്ത പ്രകൃതിവിഷയകമായ കവിയരങ്ങും അരങ്ങേറി. ചടങ്ങിൽ സംസ്കാരവേദിയുടെയും കേരളാ കോൺഗ്രസ് (എം)-ന്റെയും പ്രമുഖ നേതാക്കളും സാംസ്കാരിക പ്രവർത്തകരും പങ്കെടുത്തു.
സംസ്ക്കാരവേദി സംസ്ഥാന സെക്രട്ടറി അഡ്വ.മനോജ് മാത്യു, കേരള കോൺഗ്രസ് (എം) ആറന്മുള നിയോജകമണ്ഡലം പ്രസിഡന്റ് കുര്യൻ മടക്കൽ, കെ എസ് സി (എം) സംസ്ഥാന സെക്രട്ടറി റിന്റോ തോപ്പിൽ, കുളനട പഞ്ചായത്ത് വൈസ് പ്രസിഡന്റ് സാവിത്രി ഭദ്രൻ, കർഷക യൂണിയൻ ജില്ലാ പ്രസിഡന്റ് ജോൺ വി തോമസ്, അടൂർ രാമകൃഷ്ണൻ, ബാബു കൊച്ചുമുറി, ധന്യ ശങ്കരി, ബിജു നൈനാൻ മരുതുക്കുന്നേൽ, അഭിജിത് വിഷ്ണു, എ ജെ സൈമൺ, വി സി തോമസ്, റെജി വാലേൽപ്പറമ്പിൽ. ശ്യാം അരവിന്ദം തുടങ്ങിയവർ പ്രസംഗിച്ചു.
