ഈരാറ്റുപേട്ട : എസ്ഡിപിയുടെ പിന്തുണയോടുകുടി എല്ഡിഎഫ് കൈക്കലാക്കിയ ഈരാറ്റുപേട്ട നഗരസഭ ഭരണം യുഡിഎഫ് തിരിച്ചു പിടിച്ചു. ചെയര്പേഴ്സണായി യു.ഡി.എഫിലെ സുഹ്റ അബ്ദുല് ഖാദറിനെ വീണ്ടും തെരഞ്ഞെടുത്തു. നേരത്തേ യു.ഡി.എഫ് ഭരിച്ചിരുന്ന നഗരസഭയില് എല്.ഡി.എഫ് അവിശ്വാസ പ്രമേയത്തെ എസ്.ഡി.പി.ഐ പിന്തുണച്ചതോടെയാണ് ഭരണം എല്ഡിഎഫ് കൈക്കലാക്കിയത്.
തുടര്ന്ന് ഈ നീക്കം വിവാദമായതോടെ എസ്.ഡി.പി.ഐയുമായി ചേര്ന്ന് ഭരിക്കാനാകില്ലെന്ന് സി.പി.എം നിലപാട് എടുത്തതോടെയാണ് യു.ഡി.എഫിന് വീണ്ടും അധികാരത്തിലെത്താന് അരങ്ങൊരുങ്ങിയത്. തുടര്ന്ന് എല്.ഡി.എഫ് വോട്ടെടുപ്പില് നിന്നും വിട്ടുനില്ക്കുകയായിരുന്നു.
28 അംഗ നഗരസഭ കൗണ്സിലില് യു.ഡി.എഫിന് 14 അംഗങ്ങളും എല്.ഡി.എഫിന് ഒമ്പതും എസ്.ഡി.പി.ഐക്ക് അഞ്ചും അംഗങ്ങളാണുള്ളത്. നഗരസഭയില് ഭരണ പ്രതിസന്ധി സൃഷ്ടിക്കാനാണ് അവിശ്വാസപ്രമേയത്തിന് കളമൊരുക്കുന്നതെന്ന് യു.ഡി.എഫ് കേന്ദ്രങ്ങള് നേരത്തെ ആരോപിച്ചിരുന്നു. നഗരത്തില് വികസനപ്രവര്ത്തനങ്ങള് നിലച്ചതായും ഭരണസമിതി അംഗങ്ങള് തന്നിഷ്ടപ്രകാരം തീരുമാനങ്ങള് എടുക്കുകയാണെന്നുമായിരുന്നു എല്.ഡി.എഫ് ആരോപണം.
