ഭോപ്പാല്: സംസ്ഥാന നിയമസഭാ തിരഞ്ഞെടുപ്പിന് മുന്നോടിയായി മധ്യപ്രദേശില് ബി.ജെ.പിക്ക് കനത്ത തിരിച്ചടി. മുന് മന്ത്രിയും ബി.ജെ.പി നേതാവുമായ ദീപക് ജോഷി കോണ്ഗ്രസില് ചേര്ന്നു. ശനിയാഴ്ചയാണ് ദീപക് ജോഷി കോണ്ഗ്രസില് ചേര്ന്നത്.മുന് മുഖ്യമന്ത്രി കൈലാഷ് ജോഷിയുടെ മകനാണ് ദീപക് ജോഷി. പാര്ട്ടി സംസ്ഥാന പ്രസിഡന്റ് കമല്നാഥിന്റെ സാന്നിധ്യത്തില് പാര്ട്ടി ആസ്ഥാനത്തായിരുന്നു ദീപക് ജോഷിയുടെ പാര്ട്ടി പ്രവേശനം.
ബിജെപി നേതൃത്വത്തിലുള്ള സര്ക്കാര് തന്റെ പിതാവ് കൈലാശ് ജോഷിയുടെ പാരമ്പര്യത്തെ നിഷേധിക്കുകയാണെന്ന് മൂന്ന് തവണ എം.എല്.എയായ ദീപക് ജോഷി പറഞ്ഞു. 60കാരനായ ദീപക് ജോഷി 2003ല് ദേവാസ് ജില്ലയിലെ ബാഗ്ലിയില് നിന്നാണ് ആദ്യം നിയമസഭയിലേക്ക് മത്സരിച്ചത്, പിന്നീട് അതേ പ്രദേശത്തെ ഹത്പിപ്ലയ സീറ്റില് നിന്ന് രണ്ട് തവണ വിജയിച്ചു. ശിവരാജ് സിങ് ചൗഹാന് മന്ത്രിസഭയില് മന്ത്രി സ്ഥാനവും വഹിച്ചിട്ടുണ്ട്. 2013 വരെ മന്ത്രിയായിരുന്നു.
