മലപ്പുറം: വാടക ക്വാര്ട്ടേഴ്സില് സ്ഫോടക വസ്തുക്കളുടെ ശേഖരം കണ്ടെത്തി. അങ്ങാടിപ്പുറത്താണ് വാടക ക്വാര്ട്ടേഴ്സില് രഹസ്യമായി സൂക്ഷിച്ച സ്ഫോടക വസ്തുക്കളുടെ ശേഖരം കണ്ടെത്തിയത്. സംഭവത്തില് ഒരാള് അറസ്റ്റിലായി. സേലം സ്വദേശി സെല്വ (50) ത്താണ് അറസ്റ്റിലായത്. ഡി വൈ എസ് പി എം സന്തോഷ് കുമാറിന്റെ നേതൃത്വത്തില് എസ് ഐ ഷിജോ സി തങ്കച്ചന്, പെരിന്തല്മണ്ണ ഡാന്സാഫ് സ്ക്വാഡ് എന്നിവരടങ്ങുന്ന സംഘം നടത്തിയ പരിശോധനയിലാണ് ഇയാളെ പിടികൂടിയത്.
സ്ഫോടക വസ്തുക്കളായ ജലാറ്റിന് സ്റ്റിക്കുകള്, ഫ്യൂസ് വയറുകള്, ഡിറ്റണേറ്ററുകള് എന്നിവ അന്യസംസ്ഥാനങ്ങളില് നിന്നെത്തിച്ച് സംഭരിക്കുന്നതായും മനുഷ്യജീവന് അപകടകരമായ രീതിയില് ഇവ ആള്താമസമുള്ള സ്ഥലങ്ങളില് സൂക്ഷിച്ച് വരുന്നതായും രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തിലാണ് പരിശോധന നടത്തിയത്. ലൈസന്സോ രേഖകളോ സുരക്ഷാ മുന്കരുതലുകളോ ഇല്ലാതെ ചാക്കില് സൂക്ഷിച്ച 186 ജലാറ്റിന് സ്റ്റിക്കുകളും 150 ഓളം ഡിറ്റണേറ്ററുകളും പത്ത് കെട്ട് ഫ്യൂസ് വയറുകളുമാണ് പിടിച്ചെടുത്തത്.