ബംഗളൂരു : ട്രെയിനില് ബോംബ് വെച്ചിട്ടുണ്ടെന്ന ഭീഷണി സന്ദേശത്തെ തുടര്ന്ന് ഡല്ഹിയില് നിന്ന് ബംഗളൂരുവിലേക്കുള്ള കര്ണാടക എക്സ്പ്രസിലെ യാത്രക്കാര് പരിഭ്രാന്തരായി. ട്രെയിന് യാത്രക്കിടെ പുകവലിച്ചതിന് യാത്രക്കാരനായ സഹോദരനില് നിന്ന് ആര്.പി.എഫ് പിഴ ഈടാക്കിയതില് പ്രകോപിതനായി ഡല്ഹിയിലുള്ള യുവാവാണ് ബോംബ് വെച്ചിട്ടുണ്ടെന്ന് ഫോണിലൂടെ അറിയിച്ചതെന്ന് അന്വേഷണത്തില് കണ്ടെത്തി.
വ്യാജ ബോംബ് ഭീഷണിയെ തുടര്ന്ന് ഡിസംബര് 13ന് രാത്രി 9.15ന് ഡല്ഹിയില് നിന്നും പുറപ്പെട്ട ട്രെയിന് ബുധനാഴ്ച ഉച്ചക്ക് 1.40 ഓടെയാണ് ബംഗളൂരുവിലെത്തിയത്. ചൊവ്വാഴ്ച രാത്രിയോടെയാണ് ആഗ്രയിലെ റെയില്വേ സുരക്ഷ സേനക്ക് ഫോണ് കാള് ലഭിക്കുന്നത്. ഈ സമയം ട്രെയിന് ആന്ധ്രപ്രദേശിലെ ധര്മവാരം സ്റ്റേഷനില് എത്തിയിട്ടുണ്ടായിരുന്നു.
രാത്രി 11ഓടെ സ്റ്റേഷനിലെ ആര്.പി.എഫും റെയില്വേ പോലീസും ചേര്ന്ന് ട്രെയിന് പരിശോധിച്ചു. ഡോഗ് സ്ക്വാഡും സ്ഥലത്തെത്തി പരിശോധിച്ചു. ബുധനാഴ്ച പുലര്ച്ച മൂന്നുവരെ പരിശോധന നടത്തിയിട്ടും ഒന്നും കണ്ടെത്താനായില്ല. ആഗ്ര സ്റ്റേഷനില് നിന്നും യാത്രക്കാരിലൊരാളായ യുവാവില് നിന്നും ട്രെയിനില് പുകവലിച്ചതിന് പിഴ ഈടാക്കിയിരുന്നു. ഇതില് പ്രകോപിതനായ ഇയാള് ഡല്ഹിയിലുള്ള സഹോദരനെ വിളിച്ച് കാര്യം പറഞ്ഞു. ആഗ്ര സ്റ്റേഷനിലേക്ക് വിളിച്ച് ട്രെയിനില് ബോംബ് വെച്ചിട്ടുണ്ടെന്ന് അറിയിക്കാന് സഹോദരനോട് ഇയാള് ആവശ്യപ്പെടുകയായിരുന്നു. ഫോണ് കാള് കേന്ദ്രീകരിച്ച് നടത്തിയ അന്വേഷണത്തില് ഡല്ഹിയിലുള്ള സഹോദരനെ പിടികൂടുകയും ഇയാള് കുറ്റം സമ്മതിക്കുകയുമായിരുന്നു. പിന്നീട് കലബുറഗിയിലെ വാഡി ജങ്ഷന് സ്റ്റേഷനില് ട്രെയിന് എത്തിയപ്പോള് യാത്രക്കാരനായ യുവാവിനെയും പിടികൂടി.
