അഹ്മദാബാദ് : കോവിഡ് ബാധിതനില് നിന്ന് ദിവസേന 10,000 രൂപ വീതം തട്ടിയെടുത്ത വ്യാജ ഡോക്ടറും കൂട്ടാളികളും പിടിയിലായി. രോഗികളുടെ വീട്ടിലെത്തിയാണ് ഇവര് ചികിത്സ നടത്തിയിരുന്നത്.
ചികിത്സ തുടങ്ങി 10 ദിവസം കഴിഞ്ഞിട്ടും ഭര്ത്താവായ വിശാലിന്റെ ആരോഗ്യനിലയില് പുരോഗതി കാണത്തതിനെ തുടര്ന്നാണ് മേഘ സിര്സാതിന് സംശയം തോന്നിയത്. തുടര്ന്ന് നടത്തിയ അന്വേഷണത്തിലാണ് ഡോക്ടറും നഴ്സും വ്യാജന്മാരാണെന്ന് തെളിഞ്ഞത്. പിന്നാലെ ദമ്പതികള് അമരൈവാദി പോലീസ് സ്റ്റേഷനില് പരാതി നല്കുകയായിരുന്നു.
ഷാഹിബാഗിലെ പ്രിന്റിങ് പ്രസിലാണ് ദമ്പതികള് ജോലി ചെയ്തിരുന്നത്. ഇതിനിടെ ഇരുവര്ക്കും രോഗലക്ഷണങ്ങള് അനുഭവപ്പെട്ടു. തങ്ങളുടെ അയല്പക്കത്തുള്ള ഒരു കുടുംബം കോവിഡ് ബാധിതരായപ്പോള് ഒരു ഡോക്ടറെ വീട്ടിലേക്ക് വിളിച്ച് ചികിത്സ തേടിയിരുന്നത് മേഘയുടെ ശ്രദ്ധയില് പെട്ടിരുന്നു. ശേഷം കുടുംബം കോവിഡ് ചികിത്സക്കായി നരേന്ദ്ര പാണ്ഡ്യയെന്ന കോവിഡ് ചികിത്സകന്റെ സഹായം തോടുകയായിരുന്നു.
റീന ബെന് എന്ന നഴ്സിന്റെ കൂടെ മേഘയുടെ വീട്ടില് ചികിത്സക്കെത്തിയ പാണ്ഡ്യ കുത്തിവെപ്പിനും മറ്റുമായി 10000 രൂപയാണ് ദിവസേന ഈടാക്കിയത്. രണ്ട്, മൂന്ന് ദിവസം കൂടുമ്പോള് എത്തിയിരുന്ന പാണ്ഡ്യ സോഹൈല് എന്ന് പേരുള്ള ഒരാളെയും കൂടെ കൊണ്ടുവന്നു. വ്യാജ ചികിത്സ 15 ദിവസം പിന്നിട്ടപ്പോള് വിശാലിന്റെ ആരോഗ്യനില വഷളായി. ആശുപത്രിയെയും വിദ്യാഭ്യാസ യോഗ്യതയെയും കുറിച്ചുള്ള ചോദ്യങ്ങള്ക്ക് പാണ്ഡ്യയില് നിന്ന് ലഭിച്ച പ്രതികരണം തൃപ്തികരമല്ലാത്തതിനെ തുടര്ന്ന് മേഘയും കുടുംബവും ഇയാളെക്കുറിച്ച് അന്വേഷിച്ചു.
വിശാലിനെ സമീപത്തെ ആശുപത്രിയില് പ്രവേശിപ്പിച്ച കുടുംബം ഇയാള്ക്കെതിരെ പോലീസില് പരാതി നല്കുകയായിരുന്നു. പാണ്ഡ്യ വ്യാജ ഡോക്ടറാണെന്നും റീന വട്വ പോലീസ് സ്റ്റേഷന് സമീപത്തെ ആശുപത്രിയിലെ ജീവനക്കാരിയാണെന്നും പോലീസ് അന്വേഷണത്തില് കണ്ടെത്തി. മറ്റൊരു പ്രതിയായ െസാഹൈല് ശൈഖ് ഒരു ആശുപത്രിയിലും ജോലി ചെയ്യുന്നില്ല. മൂന്ന് പ്രതികളെയും പോലീസ് കസ്റ്റഡിയിലെടുത്തു.
