മാള : കുഴൂരില്‍ പോലീസ് ചമഞ്ഞ് കാറിലെത്തി ബൈക്ക് യാത്രികരില്‍ നിന്നും പിഴ ഈടാക്കാന്‍ ശ്രമിച്ച യുവാവ് അറസ്റ്റില്‍. പുത്തന്‍ചിറ ചിലങ്ക സ്വദേശിയായ വാഴക്കാമഠത്തില്‍ സുല്‍ത്താന്‍ കരീം (29) നെയാണ് മാള പോലീസ് അറസ്റ്റ് ചെയ്തത്. കുഴൂരില്‍ വച്ച്‌ വിദ്യാര്‍ത്ഥികള്‍ ബൈക്കില്‍ യാത്രചെയ്യവെ എതിര്‍വശത്ത് നിന്നും കാറില്‍ വന്ന പ്രതി ഇവരുടെ ബൈക്കിന് കുറുകെ കാര്‍ നിറുത്തുകയും, താന്‍ മാള പോലീസ് സ്റ്റേഷനില്‍ പുതുതായി വന്ന എസ്.ഐ ആണെന്നും പറയുകയായിരുന്നു. ഇപ്പോള്‍ മഫ്ടിയിലാണന്നും ഉടനെ പെറ്റിയടിക്കണമെന്നും പറഞ്ഞു.
വിദ്യാര്‍ത്ഥികളെ ഭീഷണിപ്പെടുത്തി ബലമായി സ്റ്റേഷനിലേക്ക് കാറില്‍ കയറ്റിക്കൊണ്ടുപോകുകയും, സ്റ്റേഷന്‍ എത്തുന്നതിന് മുമ്പ് വണ്ടി നിറുത്തി ആയിരം രൂപ നല്‍കുകയാണെങ്കില്‍ വെറുതെ വിടാമെന്നും പറയുകയായിരുന്നു. രസീത് പിറ്റേ ദിവസം സ്റ്റേഷനില്‍ നിന്ന് കൈപ്പറ്റിക്കൊള്ളാനും ആവശ്യപ്പെട്ടു. ഇയാളുടെ പെരുമാറ്റത്തില്‍ സംശയം തോന്നിയ വിദ്യാര്‍ത്ഥികള്‍ സ്റ്റേഷനില്‍ വന്ന് നേരിട്ട് പണം അടക്കാമെന്ന് പറഞ്ഞപ്പോള്‍ പ്രതി അവരെ ഉപേക്ഷിച്ച്‌ അവിടെ നിന്ന് കടന്നു കളഞ്ഞു. തുടര്‍ന്ന് ഇവര്‍ പോലീസില്‍ പരാതി നല്‍കുകയും എസ്.എച്ച്.ഒ: വി.സജിന്‍ ശശിയുടെ നേതൃത്വത്തില്‍ പ്രതിയെ പിടികൂടുകയുമായിരുന്നു. എസ്ഐ രമ്യ കാര്‍ത്തികേയന്‍, എ.എസ്.ഐ സുമേഷ്, എ.എസ്.ഐ മുഹമ്മദ് ബാഷി, സീനിയര്‍ സി.പി.ഒ ഷാഹിര്‍ അഹമദ്, സി.പി.ഒമാരായ മാര്‍ട്ടിന്‍, ഭരതന്‍ എന്നിവരാണ് അന്വേഷണ സംഘത്തിലുണ്ടായിരുന്നത്.
