തിരുവല്ല : മുനിസിപ്പാലിറ്റി കെട്ടിടത്തിൽ സ്ഥിതി ചെയ്യുന്ന തിരുവല്ല കുടുംബകോടതി മാറ്റി സ്ഥാപിക്കുന്നത് സംബന്ധിച്ച് നിവേദനം നിയമ വകുപ്പ് മന്ത്രി പി രാജീവിന് നൽകിയതായി ബാർ അസോസിയേഷൻ സെക്രട്ടറി എം.ബി.നൈനാൻ അറിയിച്ചു. പ്രസിഡണ്ട് രാജേഷ് ചാത്തങ്കരി നിവേദനം നിയമവകുപ്പ് മന്ത്രിക്ക് കൈമാറി. മുൻസിപ്പാലിറ്റി കോമ്പൗണ്ടിലെ കെട്ടിടത്തിന് കാലപ്പഴക്കം മൂലം ബലക്ഷയം ഉണ്ടെന്നുള്ള റിപ്പോർട്ടിന്റെ അടിസ്ഥാനത്തിലാണ് ഇവിടെ നിന്നും കുടുംബ കോടതി അടിയന്തരമായി മാറ്റി സ്ഥാപിക്കേണ്ടത് എന്ന് നിവേദനസംഘം മന്ത്രിയെ ധരിപ്പിച്ചു.
സംസ്ഥാനത്തിലെ കുടുംബ കോടതികളുടെ ഭരണ നിർവഹണ ചുമതല നേരിട്ട് നിർവഹിക്കുന്നത് മുഖ്യമന്ത്രിയാണെന്നും നിവേദനത്തിന്റെ അടിസ്ഥാനത്തിൽ അദ്ദേഹവുമായി കൂടിയാലോചന നടത്തിയതിനുശേഷം ഉടനടി വേണ്ട നടപടികൾ സ്വീകരിക്കുമെന്നും നിയമവകുപ്പ് മന്ത്രി അറിയിച്ചു എന്ന് ബാർ അസോസിയേഷൻ ഭാരവാഹികൾ പറഞ്ഞു. മുതിർന്ന അഭിഭാഷകനും തിരുവിതാംകൂർ ദേവസ്വം ബോർഡ് പ്രസിഡണ്ടുമായ കെ.അനന്തഗോപൻ, പത്തനംതിട്ട ജില്ല ഉപഭോക്തൃ കമ്മീഷൻ മെമ്പർ നിഷാദ് തങ്കപ്പൻ, അഭിഭാഷകരായ സിനി.പി.എം, മാത്യു ജോൺ,സിറിൽ.ടി. ഈപ്പൻ,ദീപക്ക് മാമ്മൻ മത്തായി,സിജു സാമുവൽ എന്നിവരും നിവേദന സംഘത്തിൽ ഉണ്ടായിരുന്നു.
