ന്യൂഡല്ഹി: കാര്ഷിക നിയമങ്ങള്ക്കെതിരായ കര്ഷകരുടെ മൂന്ന് മണിക്കൂര് നീണ്ട റോഡ് തടയല് സമരം ആരംഭിച്ചു. സംസ്ഥാന, ദേശീയ പാതകളാണ് കര്ഷകര് ഉപരോധിക്കുക. ഉച്ച 12 മുതല് മൂന്നുവരെയാണ് റോഡ് ഉപരോധം.
ഹരിയാനയിലെ പാല്വാലില് കര്ഷകര് റോഡ് ഉപരോധിക്കുകയാണ്. കൂടാതെ ഡല്ഹി -രാജസ്ഥാന് അതിര്ത്തിയായ ഷാജഹാന്പൂരിലും കര്ഷകര് ഗതാഗതം തടഞ്ഞുതുടങ്ങി. പഞ്ചാബിലെ അമൃത്സറിലും മൊഹാലിയിലും കര്ഷകര് റോഡിലിറങ്ങി.
കര്ഷകരുടെ ഗതാഗത സ്തംഭനത്തിന് മുന്നോടിയായി ബംഗളൂരുവിലും ഡല്ഹിയിലും കൂടുതല് നേതാക്കളെ കരുതല് തടങ്കലിലാക്കി. ബംഗളൂരുവില് 30 പേരെ കസ്റ്റഡിയിലെടുത്തു.
റോഡ് ഉപരോധ സമരത്തിന്റെ പശ്ചാത്തലത്തില് ഡല്ഹിയില് നിരവധി നേതാക്കെള പൊലീസ് കസ്റ്റഡിയിലെടുത്തതായി ആള് ഇന്ത്യ കിസാന് മസ്ദൂര് സഭ പറഞ്ഞു. സി.ഐ.ടി.യു ഡല്ഹി നോര്ത്ത് ജില്ല വൈസ് പ്രസിഡന്റ് വിപിനെ ഡല്ഹി പൊലീസ് കരുതല് തടങ്കലിലാക്കി. ഐ.എഫ്.ടി.യു ദേശീയ ട്രഷററും ഡല്ഹി പ്രസിഡന്റുമായ ഡോ. അനിമേഷ് ദാസിനെ കലക്ജി പൊലീസ് പുലര്ച്ചെ അഞ്ചുമണിയോടെ കസ്റ്റഡിയിലെടുത്തു. എ.ഐ.ടി.യു.സി സെക്രട്ടറി ചൗരാശിയയും പൊലീസ് കസ്റ്റഡിയിലാണ്.
അതേസമയം കര്ഷക സംഘടന നേതാക്കളെ അറസ്റ്റ് ചെയ്തതില് പ്രതിഷേധവുമായി സംഘടനകള് രംഗത്തെത്തി. പ്രതിഷേധത്തെ തുടര്ന്ന് സി.പി.ഐ നേതാവ് ആനി രാജ ഉള്പ്പെടെയുള്ളവരെ പൊലീസ് അറസ്റ്റ് ചെയ്തു. പ്രധാനമന്ത്രി നരേന്ദ്രമോദിയും ആഭ്യന്തരമന്ത്രി അമിത് ഷായും ജനങ്ങളെ അടിച്ചമര്ത്താന് ശ്രമിക്കുകയാണെന്ന് ആനി രാജ പറഞ്ഞു.
