ദില്ലി: കേന്ദ്ര ആഭ്യന്തര മന്ത്രി അമിത് ഷാ ചൊവ്വാഴ്ച രാത്രി കര്ഷകരുമായി നടത്തിയ ചര്ച്ച പരാജയപ്പെട്ടതിനെ തുടര്ന്ന് ഇന്ന് നടക്കാനിരുന്ന ചര്ച്ച കര്ഷകര് ഉപേക്ഷിച്ചു. നിയമം ഒരിക്കലും പിന്വലിക്കില്ല എന്നാണ് അമിത് ഷാ പറഞ്ഞത്. നിയമം പിന്വലിക്കാതെ സമരം അവസാനിപ്പിക്കില്ലെന്ന് കര്ഷകരും വ്യക്തമാക്കി. ഇതോടെ ചര്ച്ചയില് സമവായമായില്ല. നിയമം ഭേദഗതി ചെയ്യാമെന്ന സര്ക്കാര് നിലപാടും കര്ഷകര് തള്ളി. കര്ഷക വിരുദ്ധമായ നിയമം പൂര്ണമായും ഒഴിവാക്കണമെന്നാണ് സമരക്കാരുടെ ആവശ്യം.
ഈ സാഹചര്യത്തില് ഇന്നത്തെ ചര്ച്ചയില് പങ്കെടുക്കേണ്ട എന്നാണ് കര്ഷരുടെ തീരുമാനം. കേന്ദ്ര കൃഷി മന്ത്രി നരേന്ദ്ര സിങ് തോമറുമായി ആറാംവട്ട ചര്ച്ചയാണ് ഇന്ന് തീരുമാനിച്ചിരുന്നത്. കര്ഷകര് ഒരു നിലപാടാണ് സമരത്തിന്റെ തുടക്കം മുതല് സ്വീകരിച്ചത്. അഞ്ച് തവണ ചര്ച്ചകള് നടത്തിയെങ്കിലും നിലപാട് മയപ്പെടുത്താന് അവര് തയ്യാറായിട്ടില്ല.
