കൊച്ചി : ചലച്ചിത്ര അക്കാദമി ചെയര്മാന് രഞ്ജിത്തും നടന് ദിലീപും ഒരേ വേദിയില്. ഫിയോക് ബൈലോ കമ്മിറ്റി യോഗത്തിലാണ് ഇരുവരും വേദി പങ്കിട്ടത്. ആജീവനാന്ത ചെയര്മാന്, വൈസ് ചെയര്മാന് പദവികള് ഒഴിവാക്കുന്ന കാര്യം ഇന്ന് ചേരുന്ന യോഗത്തില് ചര്ച്ച ചെയ്യുമെന്ന് നേരത്തെ റിപ്പോര്ട്ടുകളുണ്ടായിരുന്നു. രഞ്ജിത്തിനെ വേദിയിലിരുത്തി പുകഴ്ത്തിയ ദിലീപ് ചലച്ചിത്ര അക്കാദമി ചെയര്മാന് സ്ഥാനത്തിരിക്കാന് രഞ്ജിത്ത് യോഗ്യനാണെന്ന് പറഞ്ഞു. ഫിയോകിന്റെ ആജീവനാന്ത ചെയര്മാനാണ് ദിലീപ്. ആന്റണി പെരുമ്പാവൂരാണ് വൈസ് ചെയര്മാന്. ആന്റണി പെരുമ്പാവൂര് ഇന്നത്തെ യോഗത്തില് പങ്കെടുത്തില്ല.
ഐഎഫ്എഫ്കെ ഉദ്ഘാടന വേദിയില് ഭാവന അതിഥിയായി എത്തിയപ്പോള് രഞ്ജിത്താണ് സ്വീകരിച്ചത്. പോരാട്ടത്തിന്റെ പെണ്പ്രതീകമെന്ന് വിശേഷിപ്പിച്ച് കൊണ്ടായിരുന്നു രഞ്ജിത് ഭാവനയെ വേദിയിലേക്ക് ക്ഷണിച്ചത്. ഇതിന് പിന്നാലെ നടിയെ ആക്രമിച്ച കേസില് ദിലീപ് ജയിലിലായിരുന്നപ്പോള് രഞ്ജിത്ത് കാണാന് പോയ സംഭവത്തെ വിമര്ശിച്ച് നിരവധി പേര് രംഗത്തെത്തിയിരുന്നു.
