കോട്ടയം : നഗരത്തില് സ്റ്റേഷനറി കടയുടെ ഗോഡൗണിനു തീപിടിച്ചു. എംഎല് റോഡില് ബവ്റിജസ് കോര്പറേഷന്റെ ഔട്ലെറ്റിന് എതിര്വശത്തെ ഗോഡൗണിനാണ് ഇന്നു പുലര്ച്ചെ 1.15ന് തീപിടിച്ചത്. സാധനങ്ങള് ഏറെയും നശിച്ചു. 2 മണിയോടെ ഭാഗികമായി തീയണച്ചു. മാങ്ങാനത്തു താമസിക്കുന്ന ഈരയില്ക്കടവ് സ്വദേശി സുനില് വാടകയ്ക്ക് എടുത്തിരിക്കുന്ന കെട്ടിടം ഗോഡൗണായി ഉപയോഗിച്ചുവരികയായിരുന്നു. സമീപത്തു താമസിക്കുന്ന കെട്ടിട ഉടമയാണ് ഗോഡൗണില്നിന്നു തീയും പുകയും ഉയരുന്നതു കണ്ടത്.
അഗ്നിരക്ഷാസേനയുടെ 4 യൂണിറ്റുകള് എത്തി ഷട്ടറുകള് തകര്ത്ത് അകത്തു കയറാന് ശ്രമിച്ചെങ്കിലും തീ ആളിപ്പടര്ന്നതിനാല് സാധിച്ചില്ല. തുടര്ന്നു പുറത്തുനിന്നു വെള്ളം അകത്തേക്ക് ഒഴിച്ചു അണയ്ക്കാന് ശ്രമം നടത്തി. സമീപത്തെ കെട്ടിടത്തിലേക്കു തീ പടരാതിരിക്കാനുള്ള ശ്രമവും സേന നടത്തി. സ്റ്റേഷന് ഓഫിസര് അനൂപിന്റെ നേതൃത്വത്തിലാണ് തീ അണയ്ക്കാന് ശ്രമം നടക്കുന്നത്. പോലീസും സ്ഥലത്തെത്തി.
