ഏറ്റുമാനൂര്: അതിരമ്പുഴ റോഡില് പ്രവര്ത്തിക്കുന്ന സ്കോഡയുടെ സര്വീസ് സെന്ററായ ഇ.വി.എം മോട്ടോഴ്സില് വന്തീപിടിത്തം. അരക്കോടിയോളം രൂപയുടെ നഷ്ടം കണക്കാക്കുന്നു. പുതിയ കാര് പൂര്ണമായും സമീപത്തുണ്ടായിരുന്ന മൂന്നു കാറുകള് ഭാഗികമായും കത്തിനശിച്ചു. വെള്ളിയാഴ്ച ഉച്ചയോടെയാണ് സംഭവം. ഷോര്ട്ട് സര്ക്യൂട്ടാണ് തീപിടിത്തത്തിന് കാരണമെന്ന് കരുതുന്നു. ജീവനക്കാര് സര്വീസ് ചെയ്തുകൊണ്ടിരുന്ന പുതിയ കാറില്നിന്ന് തീ പടരുകയായിരുന്നു. ജീവനക്കാര് വിവരം ഉടന് അഗ്നിരക്ഷാസേനയെ അറിയിച്ചു.
കോട്ടയത്തുനിന്ന് മൂന്നും കടുത്തുരുത്തിയില്നിന്ന് രണ്ടും യൂണിറ്റ് എത്തിയാണ് തീയണച്ചത്. 20 ലക്ഷം രൂപ വിലയുള്ള പുത്തന് കാര് പൂര്ണമായി കത്തിനശിച്ചു. കത്തിയ മറ്റ് കാറുകള് സര്വീസിനെത്തിച്ചവയാണ്. സമീപത്ത് വേറെയും വാഹനങ്ങളുണ്ടായിരുന്നെങ്കിലും തീ പടര്ന്നില്ല. സ്ഥാപനത്തിനകത്ത് കനത്ത പുക നിറഞ്ഞത് തീയണക്കല് ദുഷ്കരമാക്കി. കോട്ടയം സ്റ്റേഷന് ഓഫീസര് അനൂപ് പി. രവീന്ദ്രന്, എ.എസ്.ടി.ഒ കെ.എസ്. കുര്യാക്കോസ്, കലേഷ് കുമാര് എന്നിവരുടെ നേതൃത്വത്തിലാണ് തീ അണച്ചത്.