കാസര്‍കോട് : കളിക്കുന്നതിനിടയില്‍ പുല്ലില്‍ നിന്ന് തീ പടര്‍ന്ന് സഹോദരങ്ങള്‍ക്ക് ഗുരുതരമായി പൊള്ളലേറ്റു. കാസര്‍കോട് നെല്ലിക്കട്ട ജുമാ മസ്ജിദ് സമീപത്തെ താമസക്കാരനായ എ.ടി. താജുദ്ധീന്‍ നിസാമി – ത്വയിബ ദമ്പതികളുടെ മക്കളായ ഫാത്തിമ (11), അബ്ദുല്ല (ഒമ്പത്), മുഹമ്മദ് ആസിഖ് (ഏഴ്) എന്നിവര്‍ക്കാണ് ഗുരുതരമായി പൊള്ളലേറ്റത്.
ചെങ്കള ഇ.കെ. നായനാര്‍ ആശുപത്രിയിലെത്തിച്ചെങ്കിലും നില ഗുരുതരമായതിനാല്‍ പരിയാരം മെഡിക്കല്‍ കോളജിലേക്ക് മാറ്റി. ഇവരുടെ വീട്ടുമുറ്റത്ത് വലിയ കുഴി നിര്‍മ്മിച്ചിട്ടുണ്ടായിരുന്നു. ഇന്ന് വൈകീട്ട് നാലോടെ എണിയിലൂടെ കുഴിയില്‍ ഇറങ്ങിക്കളിക്കുന്നതിനിടെ ഇതിനകത്തുണ്ടായിരുന്ന പുല്ലില്‍ നിന്ന് തീ പടര്‍ന്നാണ് പൊള്ളലേറ്റത്. ദേഹമാസകലം പൊള്ളലേറ്റ കുട്ടികളില്‍ ഫാത്തിമയുടെ നില അതീവ ഗുരുതരമാണ്. വസ്ത്രങ്ങള്‍ കത്തിയാണ് ഫാത്തിമക്ക് ഗുരുതരമായി പൊള്ളലേറ്റത്.
