ബംഗളൂരു : ബംഗളൂരുവില് തക്കാളി വില കുതിച്ചുയരുന്നു. 10 രൂപയില് നിന്ന് 60 രൂപയിലേക്കാണ് തക്കാളിയുടെ വില ഉയര്ന്നത്. വരും ദിവസങ്ങളില് തക്കാളിയുടെ വില ഇനിയും വര്ധിച്ചേക്കുമെന്നാണ് വ്യാപാരികൾ നൽകുന്ന സൂചനകൾ.
മറ്റു ജില്ലകളില് നിന്നും മഹാരാഷ്ട്രയില് നിന്നുമുള്ള തക്കാളിയുടെ ലഭ്യത കുറഞ്ഞതാണ് പെട്ടന്ന് വില ഉയരാന് കാരണം. ബംഗളൂരുവിലേക്ക് തക്കാളിയെത്തുന്നത് പ്രധാനമായും ചിക്കബല്ലാപ്പൂര്, കോലാര്, ബംഗളൂരു റൂറല് എന്നിവിടങ്ങളില് നിന്നാണ്. എന്നാൽ തുടര്ച്ചയായുള്ള മഴകാരണം കൃഷിസ്ഥലം വെള്ളത്തിലായതിനാല് കൃഷി ചെയ്യാന് സാധിക്കുന്നില്ലെന്നും 50 ശതമാനം ഉല്പാദനത്തെ ബാധിച്ചെന്നും കര്ഷകര് പറയുന്നു.
തക്കാളിയുടെ വില വര്ധിച്ചതിനൊപ്പം ഉള്ളിയുടെ (സവാള) വിലയും വര്ധിച്ചിട്ടുണ്ട്. ഒരു കിലോ ഉള്ളിക്ക് 40 രൂപയിലധികമായി വര്ധിച്ചിട്ടുണ്ട്. മഴയെതുര്ന്ന് വിളവെടുപ്പായ ഉള്ളി നശിച്ചതും വില വര്ധനവിന് കാരണമായിട്ടുണ്ട്.
