പത്തനംതിട്ട : കിണര് വൃത്തിയാക്കാന് ഇറങ്ങുന്നതിനിടെയില് കിണറ്റില് അകപ്പെട്ട തൊഴിലാളിയെ പത്തനംതിട്ട ഫയര് ഫോഴ്സ് രക്ഷപെടുത്തി. പത്തനംതിട്ട പുത്തന്പീടികയില് ഷട്ടര് മുക്കിന് സമീപമുള്ള സ്വകാര്യ വ്യക്തിയുടെ കിണര് വൃത്തിയാക്കാന് ഇറങ്ങിയ ഓമല്ലൂര് വാഴമുട്ടം സ്വദേശി ദിലീപാ(42)ണ് മുപ്പതടി താഴ്ചയുള്ള കിണറില് അകപ്പെട്ടത്. രാവിലെ പത്ത് മണിയോടെ കിണറ്റില് ഇറങ്ങിയ ദിലീപിന് ശാരീരിക ബുദ്ധിമുട്ട് അനുഭവപ്പെട്ടതിനെ തുടര്ന്ന് വീട്ടുകാര് പത്തനംതിട്ട ഫയര് ഫോഴ്സിനെ വിവരമറിയിക്കുകയായിരുന്നു.
ഉടന് തന്നെ പത്തനംതിട്ട ഫയര് ഫോഴ്സ് സ്റ്റേഷന് ഓഫീസര് വിനോദ് കുമാറിന്റെ നേതൃത്വത്തിലുള്ള സംഘം സ്ഥലത്തെത്തി. തുടര്ന്ന് സീനിയര് ഫയര് ആന്റ് റസ്ക്യു ഓഫീസര് കെ.പി പ്രദീപ് കിണറ്റില് ഇറങ്ങി റസ്ക്യു നെറ്റിന്റെയും റോപ്പിന്റെയും സഹായത്തോടെ ദിലീപിനെ പുറത്തെത്തിച്ചു. ആഴമുള്ള കിണറ്റില് വായു സഞ്ചാരം കുറവായതിനാല് ദിലീപിന് ശാരീരിക അസ്വസ്ഥതകള് ഉണ്ടാവുകയായിരുന്നുവെന്ന് ഫയര് ഫോഴ്സ് പറഞ്ഞു.
