ഡൽഹി : പെട്രോൾ, ഡീസൽ വിലവർദ്ധനവിന് പിന്നാലെ രാജ്യത്ത് സിഎൻജി വിലയും വർദ്ധിപ്പിച്ചു. തലസ്ഥാനമായ ഡൽഹിയിൽ സിഎൻജി കിലോയ്ക്ക് രണ്ട് രൂപയാണ് വർദ്ധിപ്പിച്ചത്. ഇതോടെ ഡൽഹിയിലെ പുതുക്കിയ നിരക്ക് 83.01 രൂപയായി ഉയർന്നു. കഴിഞ്ഞ കുറച്ചു ദിവസങ്ങൾക്കിടയിൽ ഇത് മൂന്നാം തവണയാണ് സിഎൻജി വില വർദ്ധിപ്പിക്കുന്നത്. കഴിഞ്ഞ ആഴ്ച ഒരു രൂപയും അതിനു മുൻപ് മറ്റൊരു രൂപയും വർദ്ധിപ്പിച്ചിരുന്നു. രാജ്യത്ത് ഇന്ധനക്ഷാമം ഇല്ലെന്നും സ്രോതസ്സുകൾ ആവശ്യത്തിനുണ്ടെന്നും കേന്ദ്ര പെട്രോളിയം മന്ത്രാലയം വ്യക്തമാക്കി. ആശങ്കപ്പെടേണ്ട സാഹചര്യമില്ലെന്നാണ് ഔദ്യോഗിക വിശദീകരണമെങ്കിലും അടിക്കടിയുണ്ടാകുന്ന വിലവർദ്ധനവ് സാധാരണക്കാരെ വലിയ പ്രതിസന്ധിയിലാക്കുന്നുണ്ട്.
തിരഞ്ഞെടുപ്പ് കഴിഞ്ഞതിന് പിന്നാലെ കേന്ദ്ര സർക്കാർ സാധാരണക്കാരെ കൊള്ളയടിക്കുകയാണെന്ന് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ആരോപിച്ചു. തുടർച്ചയായുണ്ടാകുന്ന ഈ ഇന്ധന വിലവർദ്ധനവ് സാധാരണക്കാർക്കിടയിൽ വലിയ ആശങ്കയ്ക്ക് കാരണമായിട്ടുണ്ട്.
