നാദാപുരം : വീട്ടില് ഉണ്ടാക്കിയ കുഴിമന്തി കഴിച്ച രണ്ട് കുട്ടികള് ഉള്പ്പെടെ 10 പേര്ക്ക് ഭക്ഷ്യവിഷബാധ. സംഭവത്തെ തുടര്ന്ന് കുഴിമന്തി പാകം ചെയ്യാന് വാങ്ങിയ സാധനങ്ങള് ഭക്ഷ്യസുരക്ഷാ ഉദ്യോഗസ്ഥര് പരിശോധന നടത്തി. ഭക്ഷ്യ യോഗ്യമല്ലാത്തതും ഗുണനിലവാരമില്ലാത്തതും കാലാവധി കഴിഞ്ഞതുമായ വിവിധ ഭക്ഷണസാധനങ്ങള് കടയില്നിന്നും ഉദ്യോഗസ്ഥര് കസ്റ്റഡിയിലെടുത്തു.
ഇതേത്തുടര്ന്ന് സാധനങ്ങള് വിറ്റ കട അടച്ചു. ചേലക്കാട് മര്വ സ്റ്റോറാണ് പൂട്ടിയത്. ഭക്ഷണം കഴിച്ചതിന് പിന്നാലെ പനി, വയറിളക്കം, ഛര്ദി എന്നിവ അനുഭവപ്പെട്ടതിനെ ത്തുടര്ന്ന് വീട്ടുകാര് നാദാപുരം ഗവ.താലൂക്ക് ആശുപത്രിയിലും കുട്ടികള് കുറ്റ്യാടി സ്വകാര്യ ആശുപത്രിയിലും ചികിത്സതേടി. ആരോഗ്യവകുപ്പും ഭക്ഷ്യസുരക്ഷാ വകുപ്പും വീട് സന്ദര്ശിച്ചു പരിശോധന നടത്തി. തുടര്ന്ന് കുടിവെള്ളത്തിന്റെ സാംപിള് പരിശോധനയ്ക്ക് അയച്ചു.
