പത്തനംതിട്ട : നഗരസഭാ ഹരിത കർമ്മ സേനയുടെ ഫുഡ് സ്കെപ്പിംഗ് പദ്ധതിയിൽ കൃഷിക്ക് ആവശ്യമായ ഉപദേശങ്ങളും പിന്തുണയും നൽകിയ കർഷകരെ ആദരിച്ചു. ആഫീസ് സമുച്ചയങ്ങളിലെ ജൈവ മാലിന്യം സംസ്കരിച്ച് തയ്യാറാക്കിയ പാം ബയോഗ്രീൻ മാന്വർ എന്ന ജൈവ വളം ഉപയോഗിച്ച് കളക്ടറുടെ വസതിയിൽ നടത്തിയ കൃഷിയുടെ വിളവെടുത്തപ്പോഴാണ് ഹരിതശ്രീ ഫാർമേഴ്സ് ക്ലബ്ബ് അംഗങ്ങളെ ആദരിച്ചത്. ഫാർമേഴ്സ് ക്ലബ്ബ് അംഗങ്ങളായ ടി ജി സുകുമാരൻ, ഇരിപ്പച്ചോട്ടിൽ വാസു എന്നിവരെ ജില്ലാ കളക്ടർ എസ്. പ്രേം കൃഷ്ണൻ ഐ എ എസ് പൊന്നാട അണിയിച്ചു. ക്ലബ്ബ് പ്രസിഡന്റ് ചന്ദ്രനാദൻ നായർ നേരിട്ടെത്തി കൃത്യമായി ഇടവേളകളിൽ ആവശ്യമായ നിർദ്ദേശങ്ങൾ നൽകിയിരുന്നു.
ജൈവ മാലിന്യ സംസ്കരണത്തിൽ ഏറ്റവും ചെലവ് കുറഞ്ഞതും ദീർഘകാലം നിലനിൽക്കുന്നതും ലളിതവുമായ മാതൃകയാണ് നഗരസഭ ഹരിതകർമ്മസേന ഒരു വർഷക്കാലം നടത്തി വിജയിപ്പിച്ചു കാണിച്ച ഫുഡ് സ്കേപ്പിങ് എന്ന് മുനിസിപ്പൽ ചെയർമാൻ അഡ്വ. ടി സക്കീർ ഹുസൈൻ അഭിപ്രായപ്പെട്ടു. ഈ മാതൃക സാമൂഹിക സന്നദ്ധ രാഷ്ട്രീയ സംഘടനകളും റസിഡൻസ് അസോസിയേഷനുകളും പൊതുജനങ്ങളും കൂട്ടായ്മകളും ഏറ്റെടുത്തു നടപ്പിലാക്കണമെന്നും അത് വഴി മാലിന്യ സംസ്കരണത്തിലെ ഈ മാതൃക ജനകീയമാക്കണമെന്നും നഗരസഭാ പ്രദേശമാകെ വ്യാപിപ്പിക്കുവാൻ ഭരണസമിതി തയ്യാറാണെന്നും അദ്ദേഹം പറഞ്ഞു. നഗരസഭാ ആരോഗ്യ സ്ഥിരം സമിതി ചെയർമാൻ ജെറി അലക്സ്, കൗൺസിലർമാരായ ശൈലജ എസ്, എം സി ഷെരീഫ്, കൃഷി ഓഫീസർ ഷിബി, ഹരിതകരളം ജില്ലാ കോർഡിനേറ്റർ ജി അനിൽകുമാർ, മഞ്ജു പി സക്കറിയ (ജെ ഡി ഓഫീസ്) പ്രസാദ് കെ എസ് (സീനിയർ പ്രോജക്ട് കോർഡിനേറ്റർ, ഗ്രീൻ വില്ലേജ്) ഹരിത കർമ്മ സേന കൺസോർഷ്യം പ്രസിഡന്റ് ഷീന ബീവി സെക്രട്ടറി ബിന്ദു കെ എന്നിവർ പങ്കെടുത്തു.
